Педагогтары өйүүргэ сокуонунан тугу бигэргэтэргэ этэллэр?

Дойду Үөрэҕириитин министиэристибэтэ педагогтары социальнай өттүнэн көмүскүүргэ, идэлэрин аатын-суолун өрө тутарга уонна үлэлэрин усулуобуйатын тупсарарга туһаайыллыбыт сокуон барылын оҥорбут.

Сокуонунан тугу бигэргэтэргэ этэллэр:

— “Үлэ бэтэрээнэ” ааты 25 сылтан итэҕэһэ суох педагогическай ыстаастаах учууталларга иҥэрэргэ;

— судаарыстыбаннай уонна муниципальнай түмэллэргэ ыйга кырата биирдэ босхо сылдьыы;

— үлэ быраабыгар, социальнай мэктиэҕэ уонна идэлэринэн үлэлэрин боппуруоһунан босхо юридическай көмөнү ылыы;

— аан маҥнай үлэҕэ киирэр педагогтарга сылтан итэҕэһэ суох аҕа сүбэһити көрүү;

— үлэлэрин хайысхатынан мэтиэдикэ өттүнэн тиһигин быспакка арыаллааһын;

— үс сылга биирдэ эбии үөрэхтээһини ааһыы;

— бүддьүөт суотугар тэриллибит үөрэх электроннай матырыйаалларыгар уонна сыыппара бибилэтиэкэлэригэр эбии киирэн туһаныы.

Сокуон барылыгар туспа хайысханан сөбүлэҥ бэриллибэтэх түгэнигэр хаартыскаҕа түһэрииттэн, видеоҕа устууттан педагогтары көмүскээһин киирэр.

Миниистир Сергей Кравцов саҥа миэрэлэр учуутал идэтэ уһулуччу суолталааҕын бигэргэтэргэ систиэмэлээх үлэни салгыыллар уонна педагогическай үлэҕэ ытыктабылы үрдэтэргэ көмөлөһүөхтээх диэн бэлиэтиир.

Сокуон барылын нуорма быраабын аакталарын федеральнай порталыгар таһаарбыттар.