Петр Шамаев Мииринэйгэ волонтердар ыстааптарыгар сырытта

Бырабыытылыстыба дэлэгээссийэтин оробуочай сырыытын чэрчитинэн СӨ Ыччат дьыалаларыгар уонна социальнай коммуникацияларга миниистирэ Петр Шамаев Мииринэйгэ сырытта.

Кини «Мирные руки ангела» уонна «Мы вместе — Мирный» диэн икки улахан волонтерскай ыстаапка сылдьан, байыаннай дьайыы кыттыылаахтарыгар көмөлөһөр доброволецтары кытта көрүстэ, диэн  «Мирнинский рабочий» хаһыат суруйар.

Петр Шамаев бэйэтэ — байыаннай дьайыы бэтэрээнэ, онон патриотическай иитиигэ улахан болҕомтотун уурар. Волонтердары кытта көрсүһүүлэргэ кини бу үлэ сүҥкэн суолталааҕын бэлиэтээтэ уонна кинилэр кылааттарын иһин махтанна.

«Гуманитарнай көмө кырдьык туһалыыр, маны мин бэйэм харахпынан көрбүтүм. Көмөлөһөртөн уонна төрөөбүт дойдуттан кэһиини тиэрдэртэн ордук туох да суох», – диэн бэлиэтээтэ кини.

Миниистир Мииринэй оройуонугар  үлэ үрдүк таһымҥа тэриллибитин эттэ: көмөнү хомуйуу тэтимэ намтаабат, саҥа ньымалар көстөллөр, хомуллар көмө кээмэйэ улаатар эрэ.

«Бырабыытылыстыба уонна Ил Дархан ааттарыттан бу үлэҕэ кыттар бары дьоҥҥо махталбын тиэрдиэхпин баҕарабын. Бу дьиҥнээхтик уолаттарбыт олохторун быыһыырга көмөлөһөр», — диэтэ Шамаев. Кини инники күөҥҥэ Саха сирин уолаттарыгар ураты сыһыан баарын тоһоҕолоон эттэ.

«Дьиэттэн кэлэр гуманитарнай өйөбүл хас биирдии киһиэхэ тиийэр. Биһиги кими да умнубатах киһи диэн кыһаллабыт, оттон оройуоннар кимҥэ туох наадатын билэннэр, чуолкайдык үлэлииллэр», – диэн эбэн эттэ миниистир.

Ону таһынан, Шамаев Мииринэйдээҕи  байыаннай дьайыы түмэлигэр сырытта. Түмэли тэрийээччи Юлия Порядочных тэрилтэ устуоруйатын уонна оскуола оҕолоругар ыытыллар тэрээһиннэр тустарынан кэпсээтэ.