Пилота суох авиация үлэһиттэрин күнүн олохтуохтарын баҕараллар

Арассыыйаҕа саҥа идэлээх бырааһынньык баар буолуон сөп. «Авиапорт» ааҕыныстыба Беспилотнай авиация үлэһитин күнүн олохтуурга этии киллэрдэ. Ону ыам ыйын 23 күнүгэр бэлиэтиир тоҕоостоох диэн ааттыыллар.

«Бырааһынньык күнүнэн ыам ыйын 23 күнүн аныырга этэбит — бу күн ССРС Миниистирдэрин Сэбиэтин уурааҕынан аан бастакы сиэрийэлээх Ту-123 „Ястреб“ пилота суох көтөр аппарааты сэриигэ (сэп-сэбиргэл быһыытынан) туттарга ылыммыттара», — диэн «Авиапорт» генеральнай дириэктэрэ Иван Скляров РИА Новости быһаарда.

Исписэлиис бэлиэтээбитинэн, пилота суох авиация Арассыыйа экэниэмикэтин хас да эйгэтигэр  уларытыылары киллэрэр. Кини санаатынан, дойду сайдыыта уонна этэҥҥэ буолуута бу таһымтан быһаччы тутулуктаах.