Полиция үлэһиттэрэ тиэхиньикэни арендалааһыҥҥа 165 тыһыынча солкуобай хоромньулаах түөкүннээһини арыйдылар

Арассыыйа ИДьМ Дьокуускайдааҕы 3 №-дээх полиция отделын дьуһуурунай чааһыгар цифровой уонна көмпүүтэр тиэхиньикэтин арендалааһынынан дьарыктанар урбаанньыт дьахтартан баайын-дуолун уоруу туһунан сайабылыанньа кииирбит.

Эмсэҕэлээбит дьахтар урут биир эдэр киһиэхэ 165000 солкуобайдаах персональнай көмпүүтэри арендалаабыт, ол эрээри болдьоммут кэмигэр тиэхиньикэни төннөрбөтөх уонна сибээскэ тахсыбат буолбут.

Арассыыйа ИДьМ Дьокуускйадааҕы полициятын баайга-дуолга сыһыаннаах буруйдары арыйар отделын үлэһиттэрэ суһал-көрдүүр дьаһаллары ыытаннар, уорбаланааччыны быһаарбыттар. Кини 20 саастаах Дьокуускай куорат олохтооҕо буолара биллибит.

Уорбаланааччы арендаҕа ылбыт тиэхиньикэтин олох даҕаны төннөрөр санаата суох эбит, көмпүүтэри ломбардка туттарбыта быһаарылынна. Онтон ылбыт харчытын тус наадатыгар туттубут.

Киниэхэ Арассыыйа Федерациятын Холуобунай кодексын 159 ыст. 2 ч. «Түөкүннээһин» иһин холуобунай дьыала көбүтүлүннэ.