«Путь ВОИНа» күрэс өрөспүүбүлүкэтээҕи түһүмэҕэ саҕаланна

Дьокуускай куоракка «Путь ВОИНа» диэн байыаннай-успуорт күрэһэ саҕаланна. Байыаннай күрэхтэһии икки күн, кулун тутар 27-28 күннэригэр ыытыллыа.

Саха сирин араас муннуктарыттан хомуллубут бастыҥ 10 хамаанда бэйэлэрин кыахтарын көрдөрүөхтэрэ, илин-кэлин түсүһэн бастыыр иһин күрэхтэһиэхтэрэ. Тэрээһин «ВОИН» киин Саха сиринээҕи филиалын өйөбүлүнэн үрдүк таһымнаахтык ыытыллар. Судьуйа кэллиэгийэтин уопуттаах инструктор-методистар салайаллар. Кылаабынай судьуйанан киин педагог-психолога Василий Находкин буолар.

Бүгүн «Путь ВОИНа» байыаннай-успуорт күрэхтэһии үөрүүлээх быһыыга-майгыга аһылынна. Бочуоттаах караул знамялары киллэрээтин, Арассыыйа уонна Саха сирин Өрөгөй ырыалара дуорайдылар.

Тэрээһин СӨ Бырабыыталыстыбатын Бэрэссэдээтэлин солбуйааччы Анатолий Семенов тыл этиитинэн аһылынна.

«Буойун суола көннөрү суол буолбатах, хамаанданан, биир сомоҕо буолан, биир сыалы-соругу толоруу буолар. Өрөспүүбүлүкэ ыччат патриотическай иитиитин мэлдьи өйүүр. Былырыын өрөспүүбүлүкэ хамаандата «Путь ВОИНа» бүтүн Арассыыйатааҕы оонньуулар кыайыылаахтарынан буолбута. Бу кыайыы чэпчэкитик кэлбэтэҕэ. Бу улахан тэрээһин үлэтиттэн, Бырабыыталыстыба, үөрэх тэрилтэлэрэ, «ВОИН» киин бииргэ үлэлээһиннэрин түмүгэ. Биллэн турар, эһигини кытта күн аайы үлэлиир уһуйааччылар, методистар ураты оруолларын бэлиэтиэххэ наада. Бу аҥардас сүүмэрдээһини, бэлэмнэниини эрэ ааспыт буолбакка, үксүлэрэ байыаннай дьайыыга кыттыбыт улахан уопуттаах дьон. Ол эбэтэр бу билиини-көрүүнү билэр, сатыыр, чопчу эһиэхэ биэрэр дьон буолаллар. Эһиги үүнэр көлүөнэҕэ холобур буолуохтааххыт уонна үйэҕит тухары оннук хаалыахтааххыт. Мин эһиэхэ ситиһиини баҕарабын», — диэн Анатолий Семенов эттэ.

«Воин» киин салачааччыта Василий Егоров ааспыт күрэхтэһиигэ Саха сирин хамаандата чаҕылхайдык киирсэн бастаабытын бэлиэтээтэ. Бу түһүмэххэ кытта кэлбит ыччаттарга ситиһиини баҕарда. Бу тэрээһин эдэр дьоҥҥо бэйэ-бэйэни өйөһөр санааны, тулуурдаах буолууну уонна төрөөбүт дойдуга тапталы иҥэрэргэ улахан суолталаах диэн бэлиэтээтэ.

Кылаабынай судьуйа, киин педагог-психолога Василий Находкин бу күрэхтэһии туһунан санаатын маннык үллэһиннэ:

“Бүгүн биһиэхэ «Путь ВОИНа» байыаннай-успуорт күрэхтэһиитин өрөспүүбүлүкэтээҕи түһүмэҕэ саҕаланна. Бу күрэхтэһии иккис сылын ыытыллар. Улуустартан уонна куорат оскуолаларыттан 10 хамаанда кэлэн кытта сылдьар. Үөһээ Бүлүү, Хаҥалас, Нам, Ньурба улуустарыттан, Дьокуускай куораттан бааллар. Федеральнай анал бырагырааманан күрэхтэһии 9 сорудахтаах, онтон биһиги 8 ыытабыт. Быһа холоон 1400 миэтэрэҕэ сүүрүү уонна 8 сорудаҕы толоруу киирэр. Онно пилота суох көтөр аппарааты салайыы, пневматическай бинтиэпкэнэн ытыы, миинэлээх хонууну ыраастааһын, гранатаны быраҕыы, мэһэйдэри туорааһын курдук түһүмэхтэр бааллар», — диэн Василий Находкин кэпсиир.

Күрэхтэһиигэ муниципальнай түһүмэххэ күрэхтэһэн сүүмэрдэммит хамаандаларыттан 14-17 саастаах уолаттар уонна кыргыттар кытталлар. Хас биирдии хамаанда 10 киһиттэн турар: хамандыыр, снайпер, БПЛА оператордара, стрелок-сапер, стрелок-санитар уонна штурмовиктар.

Эдэр буойуннар гранатаны быраҕан, «Салгын лабирина» уонна «Халлаан штурма» түһүмэхтэригэр беспилотниктары салайыыга, миинэлэртэн ыраастааһын, пневматическай бинтиэпкэнэн ытыы үөрүйэхтэрин көрдөрүөхтэрэ, ону тэҥэ мэһэйдэр балаһаларын ааһан «бааһырбыт киһиэхэ» бастакы көмөнү оҥоруохтара.

Бүгүн саамай интэриэһинэй лазертаг хамаанданан байыаннай-тактическай оонньуу буолла. Бэлиэтээн эттэххэ, бу күрэскэ кыайбыт хамаанда Саха сирин Арассыыйатааҕы түһүмэххэ көмүскүүр быраабы ылыаҕа.