Рамир Николаев стендовай ытыыга — дойду чөмпүйүөнэ

Липецк куоракка ыччаттарга стендовай ытыыга Арассыыйаҕа бастыыр иһин турнир буола турар. Бу улахан таһымнаах күрэхтэһиигэ Саха сирин  күрэсчитэ Рамир Николаев «Трап» көрүҥҥэ кыһыл көмүс мэтээли ылан, дойду чөмпүйүөнүнэн буолла.

Престижтээх күрэхтэһиигэ Арассыыйа 15 эрэгийиэниттэн 200-тэн тахса ытааччы кыттар. 22 саастарыгар диэри күрэсчиттэр «Скит» уонна «Трап» диэн икки көрүҥҥэ сыалы ытыыга күрэхтэһэллэр. Биир нэдиэлэ устата уопсайа 10 мэтээл кэмпилиэгэ оонньонор. Дойду кыайыылаахтара уонна бириистээхтэрэ кэлэр сезоннарга Арассыыйа сүүмэрдэммит хамаандатыгар киирэр кыахтаналлар диэн «Sportyakutia.ru» суруйар

«Трап» көрүҥҥэ кыһыл көмүс мэтээл иһин быһаарыылаах киирсиигэ Степан Константинов, Александр Макаров, Богдан Мочалин уонна Саха сириттэн Рамир Николаев күөн көрүстүлэр. Бастакынан Макаров туораабыта, онтон Мочалин боруонса мэтээли ылбыта. Салгыы кыһыл көмүс иһин киирсиигэ Николаев тута иннигэр тахсыбыта, ол эрээри москвич Константинов утарсааччыттан хаалбатаҕа. Ол кэннэ Рамир Николаев 30:29 ахсаанынан кыайыыны ситистэ.

Рамир Николаев кыайыытын кэнниттэн долгуйар санаатын маннык үллэһиннэ: «Билигин даҕаны кыайбыппын итэҕэйэ иликпин. Кытаанах үлэ, төрөппүттэрим, билэр дьонум уонна тапталлаах кыыһым көмөлөрө — кыайыым ситиһиитэ. Степанныын киирсии олус күүстээх этэ. Мин болҕомтобун барытын сорудахха уурарга уонна мэһэйдэри тэйитэргэ  үлэлээбитим. Маныаха миигин тириэньэрим Диего Гасперини үөрэппитэ, ол иһин киниэхэ олус диэн махтанабын. Олус улахан кыайыы — бэйэбинэн киэн туттабын».