Расул Гамзатов «Төрөөбүт тылбынан» кинигэтэ сүрэхтэннэ

Балаҕан ыйын 8 күнүгэр Арассыыйа норуоттарын тылларын күнэ өрө көтөҕүллүүлээхтик бэлиэтэнэр. Бу бэлиэ күн Дагестан норуодунай бэйиэтэ, уопсастыбаннай диэйэтэлэ Расул Гамзатов төрөөбүт күнүгэр олохтоммута. Бэйиэт төрөөбүт дойдутугар кини сахалыы тылбаастаммыт кинигэтин сүрэхтээһин буолла.

Расул Гамзатов «Төрөөбүт тылбынан» диэн кинигэтин сүрэхтээһин Махачкала куоракка Дагестан Национальнай бибилэтиэкэтигэр ыытылынна. «От Кулаковского до Гамзатова» эрэгийиэннэр икки ардыларныааҕы сырдатар-култуурунай бырайыак  биир сүрүн тэрээһинэ буолла.

Расул Гамзатовы сэбиэскэй кэмҥэ билбэт киһи суоҕа буолуо. Кини «Туруйалар», о.д.а. ырыалара билигин да ылланаллар, норуокка тыыннаахтар. Хоһоонноро элбэх норуоттар тылларыгар тылбаастаммыта. Онон бу Норуоттар тылларын күнүгэр кини хоһоонноро, ырыалара элбэх сиргэ иһиллэр буолуохтаахтар.

Расул Гамзатов хоһооннорун саха классик суруйааччылара тылбаастаабыттара: Семен Данилов, Михаил Тимофеев, Дмитрий Дыдаев, Афанасий Илларионов, Альберт Бүлүүйүскэй…

Бу кинигэни аныгы кэмҥэ Ил Түмэн бэрэссэдээтэлин солбуйааччы Александр Жирков уонна Саха сирин Суруйааччыларын сойууһа (Наталья Харлампьева) түмэн, бэрийэн, талан, оҥорон таһаардылар. Онон «От Кулаковского до Гамзатова» бырайыак чэрчитинэн ыытыллар тэрээһиннэргэ илии тутуурдаах, өттүк харалаах буоллулар.

«Төрөөбүт тылбынан» кинигэни сүрэхтээһиҥҥэ Гамзатовскай бэстибээлгэ 25 эрэгийиэнтэн, тас дойдулартан кэлбит суруйааччылар, тылбаасчыттар, уопсастыбанньыктар кытыннылар.

Арассыыйа Суруйааччыларын сойууһун бастакы сэкиритээрэ Геннадий Иванов олус истиҥ тыллары эттэ. Кини кинигэ тас хаҕын олус хайҕаата. «Кинигэ дириҥ ис хоһоонун арыйар ойуулаах, Гамзатов олус сэдэх хаартыскатын булан туруорбуккут» диэн кини эттэ.

Кумык норуодунай бэйиэттэрэ Багаутдин Андиев, Супиянат Мамаева, Алтаай норуодунай суруйааччыта, Эл Курултай дьокутаата Иван Белеков, ногай норуодунай бэйиэтэ Бике Кулунчакова, Дагестан Суруйааччыларын сойууһун эппиэттээх сэкиритээрэ Мурад Ахметов, Марина Ахметова, уо.д.а. бэйэлэрин санааларын тиэртилэр.

— Саха сирэ духуобунаһын, култууратын харыстыырын Евразия нруоттарын эпостарын киинэ, атын норуоттартан бастакынан соҕотох Олоҥхо тыйаатыра тэриллибиттэрэ туоһулуур. «Ньургун Боотур» олоҥхо алтаай тылыгар тылбаастаммытынан киэн туттабыт. Бүгүҥҥү күҥҥэ Гамзатов хоһоонноро түҥ былыргы саха тылыгар тылбаастаммыттара ураты суолталаах дии саныыбын. Норуоттары сомоҕолуур, чугаһыннарар литература. Бу бүтүн Арктика циркумполярнай цивилизациятыгар суолтата улахан. Биһиги бүгүҥҥү сорукпут — тылбытын, духуобунай, култуурунай баайбытын харыстаан хаалларыы буолар. Саха сирэ итиннэ биһиэхэ холобур буолар, — диэн Иван Белеков эттэ.

Кинигэни сүрэхтээһини Саха сирин Суруйааччыларын сойууһун бэрэссэдээтэлэ Наталья Харлампьева салайан ыытта.