Роспотребнадзор буруонан сибээстээн лабаратыарыйа түмүгүн туһунан иһитиннэрдэ

Роспотребнадзор атырдьах ыйын 28 күнүгэр Дьокуускайга буруонан сибээстээн, лабаратыарыйа салгыны кэтээн көрүүтүн түмүгүн билиһиннэрдэ. Баһаартан сибээстээн буруо буолбутунан, Роспотребнадзор управлениета “Дьокуускай куорат” куораттааҕы уокурукка салгын хаачыстыбатын күүскэ хонтуруоллуур. Суукканы эргиччи кэтээн көрөр.

2026 сыл атырдьах ыйын 28 күнүн сарсыарда 8 чаастаах туругунан, куорат үс атын-атын хонтуруолланар сирдэригэр 18 инструментальнай кээмэйдээһин оҥоһуллубут. Лабаратыарыйа чинчийиитин түмүгүнэн, салгынтан ылыллыбыт бэрэбиэркэ муҥутуур үрдүк концентрацията (ПДК) үрдээһинэ көстүбүт: кытаанах уонна убаҕас өлүүскэтэ (взвешенные вещества) – 1,56 төгүл, PM10 частицата – 1,4 төгүл, РМ2,5 частицата – 2 төгүл, Диоксид азота  — 1,2 төгүл үрдээбит. Угарнай гаас, оксид азота, специфическэй бэссэстибэ (формальдегид, бенз(а)пирен) тустаах сирдэргэ ити бириэмэҕэ бэлиэтэммэтэх. Салгыны салгыы кэтээн көрөллөр.

Роспортебнадзор управлениета Дьокуускай куорат олохтоохторугар бу курдук сүбэлиир: таһырдьа сылдьартан туттунуҥ, ол иһигэр физкултууранан дьарыктанартан эмиэ. Бу бастатан туран, оҕолорго, саастаах дьоҥҥо уонна хат дьахталларга сыһыаннаах. Улахан кыһалҕаҕыт суох буоллаҕына таһырдьа тахсымаҥ. Дьиэҕит түннүгүн-үөлэһин саба сылдьыҥ. Түннүгү аһар буоллаххытына, сииктээх маарыланы эбэтэр чараас хлопчатобумажнай таҥаһы ыйааҥ, кэмиттэн-кэмигэр уунан сиигитэ сылдьыҥ.

Таһырдьа тахсаргытыгар маасканы эбэтэр респираторы кэтиҥ (бырамыысыланнай уонна бытовой ордук туһалаах).

Дьиэҕитин, үлэлиир сиргитин күннэтэ уунан сууйуҥ. Салгыны ыраастыыр тэрили туһаныҥ.

Туруккут мөлтөөбүт, мэйиигит эргийэр, кураанахтыы сөтөллөр, күөмэйгит аһыйар, кыайан утуйбат буоллаххытына суһаллык бырааска көрдөрүҥ.  Бу туһунан Саха сиринээҕи Роспотребнадзор МАХ-ханаалыгар иһитиннэрэр.