Роспотребнадзор дирофиляриозка сыстыы түгэнэ элбээбитин туһунан иһитиннэрбит

Роспотребнадзор бырдах тарҕатар дирофиляриоз диэн сыстыганнаах ыарыыта элбээбитин туһунан иһитиннэрбит, сэрэппит. Бу туох ыарыыный, хайдах сыстарый? “Парламент хаһыата” бу туһунан суруйар.

Роспотребнадзор иһитиннэрбитинэн, бу ыарыы ордук арҕааҥҥы эрэгийиэннэргэ тарҕанара биллэр эрээри, кэлин дойду киин өттүгэр эмиэ бэлиэтэнэр буолбут.

Сеченов аатынан университет мэдиссиинэҕэ паразитологиятын уонна вирусологияҕа кафедратын бэрэпиэссэрэ Евгений Морозов иһитиннэрбитинэн, дирофиляриоз, биллэр уонна үчүгэйдик үөрэтиллибит ыарыы. Ол гынан баран, поликлиникаҕа эбэтэр учаастактааҕы терапевка көрдөрүннэххэ дэбигис быһаара охсумуохтарын сөп. Ол иһин тустаах ыарыы туһунан ыстатыыстыканы толору буолбатах диэн этэллэр.

“Бу ыарыыны тарҕатааччыларынан көннөрү бырдахтар буолалларын быһыытынан, дирофиляриоз ханна баҕарар баар буолуон сөп. Климат төһөнөн сылаас да, соччонон ыарыы тарҕаныыта элбээн иһэр. Ол эрээри, сөрүүн соҕус Кировскай уобаласка дьон бу ыарыыга эмиэ сыстыбыта бэлиэтэммитэ”, – диэн эппит.

Ыарыыга сыстыбыт киһи этигэр паразит үөскүүр: 20 см диэри уһуннаах синньигэс чиэрбэ. Чиэрбэлэр тирии иһинэн сылбырҕатык хамсыыллар, көрүҥүттэн тутулуктанан харахха, ис уоргаҥҥа киириэхтэрин сөп. Киһи дирофиляриозтан өлбөт эрээри, туох да үчүгэйэ суох.

“Киһи этигэр ханнык баҕарар атын биологическай үөн киириитэ киһиэхэ кутталы үөскэтэр. Бастатан туран, атын белок баарын быһыытынан аллергияны көбүтэр. Итиэннэ биллэн турар, киһи этигэр чиэрбэ сылдьар буолан психикаҕа дьайар. Киһи ол туһунан билэн баран кырата ньиэрбинэйдиир” , – диир.

Дирофиляриоһу көннөрү бырдахтар тарҕаталларын быһыытынан, бастатан туран, бырдахтан харыстанар ньымалары туһанар ирдэнэр: репеллени, анал харыстыыр көстүүмү, түннүккэ иилиллэр сиэккэни.

“Манна даҕатан эттэххэ, дирофиляриоз ыарыыны көбүтээччилэр ордук ыкка баар буолаллар. Онон ыты иитэр сирдэртэн киһи бу ыарыыга сыстыан эмиэ сөп”, – диэн быраас кэпсээбит. Бу туһунан “Парламент хаһыата” суруйар.