Саахымакка Ил Дархан Кубога ыытыллыаҕа

Төрдүс төгүлүн өрөспүүбүлүкэҕэ дойду күүстээх саахыматчыттара түмсүөхтэрэ. Дойду Бэрэсидьиэнэ Владимир Путин көҕүлээбит “Арассыыйа успуорда” федеральнай судаарыстыбаннай бырагыраама туруорар соругун иитинэн, кулун тутар 31 күнүттэн муус устар 4 күнүгэр диэри саахымакка Ил Дархан кубога буолуоҕа.

Күрэхтэһии уопсай бириискэ пуондата – 2 мөл. солк. Кыттааччылар кэккэлэригэр норуоттар икки ардыларынааҕы 6 гроссмейстер баар.  Бырагыраамаҕа эр дьоҥҥо күрэхтэһии, блиц, рапид, ону тэҥэ, саахымат композициятын суоттааһын бааллар. Күрэхтэһии Өктөм сэлиэнньэтигэр, Аллараа Бэстээх бөһүөлэгэр уонна Дьокуускай куоракка буолуоҕа.

“Хас турнир аайы күрэхтэһэ кэлэбин. Бу успуорт, онон түмүк араас буолуон сөп. Ол эрээри, Саха сирин олус сөбүлээтим, үөрүүнэн кэллим. Оонньуу, күрэхтэһэ, саҥа сирдэри көрө. Быйыл саахымат композициятын суоттааһыны ордук сэҥээрэбин. Бу мин аан маҥнайгы уопутум. Бэйэм Уһук Илинтэн сылдьар буолан, ыраах усулуобуйаҕа олорон сайдар уустугун өйдүүбүн. Эрэгийиэҥҥэ бу курдук таһымнаах турнирдар ыытыллаллара сыаналанар”, – диэн гроссмейстер, Арассыыйа успуордун үтүөлээх маастара Наталья Погонина санаатын үллэһиннэ.