Саастаахтар уһун үйэлэнэр туһугар

Саха сиригэр аҕам саастаах дьоҥҥо физкултуура уонна чэбдигирдэр үлэ тиһигэ сайдар.

2025 сыллаахха олоххо көхтөөх буолууну, доруобуйаны, чэбдик буолар туһугар бэйэни көрүнүүнү тэрийэр араас тэрээһиннэргэ, дьарыктарга Саха сирин үрдүнэн аҕам саастаахтар, уопсайа 39 тыһыынчаттан тахса киһи хабыллыбыта бэлиэтэнэр.

Көхтөөх уонна доруобай уһун үйэлэниигэ усулуобуйаны тэрийии судаарыстыба бэлиитикэтин биир тутаах хайысхатынан буолар. РФ Бэрэсидьиэнэ Владимир Путин аҕам саастаахтарга көхтөөх уонна сөптөөх усулуобуйаны тэрийии, ол иһигэр физическэй култууранан дьарыктанар, доруобуйаны бөҕөргөтөр кыахтары кэҥэтии улахан суолталааҕын бэлиэтээбитэ. Маныаха Саха сиригэр саастаах дьоҥҥо ити хайысхаҕа анаммыт дьаһаллар ситимнэрэ сайдар. Спортивнай инфраструктура табыгастаах, барыларыгар кыаллар буолуутугар, ГТО комплексын нормативтарын толорууга, аһаҕас былаһааккаларга дьарыгы тэрийиигэ уонна спортивнай эбийиэктэргэ чэпчэтиинэн туһанан сылдьарга ураты болҕомто ууруллар.

Биир биллэр тэрээһининэн Дьокуускайга сайын аҕам саастаахтарга анаммыт СӨ бэһис үбүлүөйдээх спартакиадата буолбута. Күрэхтэһиигэ улуустартан 15 хамаанда, 150 тахса спортсмен кыттыыны ылбыта. Түөрт күн устатыгар кинилэр чэпчэки атлетикаҕа, харбааһыҥҥа, буулдьанан сыал ытыытыгар, остуол тенниһигэр, шахмакка, дартска уонна комбинированнай эстэпиэтэҕэ күрэхтэспиттэрэ, ГТО нуормаларын туттарыыга илин-кэлин түһүспүттэрэ.

Бу спартакиада спортивнай күрэхтэһии эрэ буолбакка, саастаах дьон алтыһар, уопут атастаһар уонна көхтөөх олоҕу тарҕатар былаһааккаларынан буолбута. Тэрээһин «Спорт России» судаарыстыбаннай бырагыраама, РФ Бэрэсидьиэнэ Владимир Путин көҕүлээбит соруктарын толорууга туһуланар.

Көхтөөх уһун үйэлэнии тиһигин сайыннарыыга улахан хардыынан «Физическэй култуура уонна маассабай успуорт управлениета» ГБУ структуратыгар уһун үйэлэниигэ инструктордар институттарын тэрийии буолбута.

Бүгүн исписэлиистэр Дьокуускайга, Нам, Өлөөн, Сунтаар, Үөһээ Бүлүү, Бүлүү уонна Чурапчы улуустарыгар үлэлииллэр. Физкултуура- чэбдигирдэр үлэ отделын исписэлиистэрин кытта үөрэх сэминээрдэрин, пуорумнары, «Десант ЗОЖ» көһө сылдьар аахсыйалары, успуорт бэтэрээннэрин уонна саастаах спортсменнары кытта көрсүһүүлэри тэрийэн ыыталлар.

СӨ успуорт миниистирэ Леонид Спиридонов аҕам саастаах спортсменнар сыл аайы Арассыыйатааҕы спартакиадаҕа кытталларын бэлиэтиир. Кини успуордунан, физкултууранан дьарыктанар кыах күрэхтэһии кыттыылаахтарыгар эрэ буолбакка, хас биирдии киһиэхэ наадалааҕын этэр.

Маныаха аҕам саастаах көлүөнэ дьонугар сарсыардааҥҥы сэрээккэлэр, хаамыыга, фитнескэ, йогаҕа дьарыктар, үҥкүүгэ маастар-кылаастар, ону таһынан оҕолору, ыччаты, саастаах дьону түмэр дьиэ кэргэн спортивнай аахсыйалара тиһиктээхтик тэриллэллэр.

Көхтөөх уһун үйэлэниигэ туһуланар тэрээһиннэр аҕам саастаах көлүөнэни чэгиэн-чэбдик буоларга сирдииллэр, дьону-сэргэни кытта алтыһалларыгар, уопсастыбаннай тэрээһиннэргэ кытталларыгар тирэх буолаллар. Саха сиригэр бу хайысханан ыытыллар үлэ Дьокуускайга да, улуустарга да тиһиктээхтик салҕанар.

Сиһилии: https://minsport.sakha.gov.ru/news/62975

СӨ успуорт министиэристибэтин пресс-сулууспата

Хаартыска: «Мой спорт», СӨ успуорт министиэристибэтин саайтыттан