Саха кыыһа Казахстаҥҥа Муода нэдиэлэтигэр кыайда!

Арктикатааҕы ускуустуба, култуура, креативнай индустрия университетын 3-с кууруһун устудьуоҥката Сандаара Порохонько 28-с төгүлүн ыытыллыбыт Казахстан муодатын нэдиэлэтигэр Гран-при бириэмийэтин ылла.

Муода нэдиэлэтэ муус устар 14-16 күннэригэр Алматы куоракка буолла. Подиумҥа Казахстан, Кыргызстан, Таджикистан, Грузия, Германия, Азербайджан, Арассыыйа кыттааччылара «Культурный код и наследие» тиэмэнэн 33 кэлиэксийэни көрдөрдүлэр.

«Сандаара наһаа талааннаах, кини кэлиэксийэтэ дьүүллүүр сүбэни да, көрөөччүлэри да сөхтөрдө. Кини настаабынньыга, талааннаах дизайнер Лилиана Алексеева салалтатынан, ураты уобарастары айар-тутар», — диэн АГУИККИ пресс-сулууспата иһитиннэрдэ.

Маны тэҥэ, Kazakhstan Fashion Week куонкурус финалыгар АГУИККИ преподавателэ Лилиана Алексеева уонна 3-с куурус устудьуона Валерия Осокина киирдилэр. Кинилэр Арассыыйа уонна Саха сирин соҕотох бэрэстэбиитэллэрэ буоллулар.

Тохсунньуттан саҕалаан, кинилэр эскизтэри оҥоруунан, таҥаһы тигиинэн күүскэ дьарыктанан, ураты кэлиэксийэни айан таһаардылар, дьон-сэргэ биһирэбилин ыллылар, Саха сиригэр олус талааннаах дьон олроллорун өссө төгүл итэҕэттилэр.