Саха кыыһа «Пацанки» бырайыак финалиһынан буолла

Саха сирин Өлүөхүмэ куоратын олохтооҕо Лидия Орлова «Пятница!» телеханаалга «Пацанки» бырайыак онус сезонун финалыгар тиийдэ. 21 саастаах Өлүөхүмэ олохтооҕо Лидия Орлова бары тургутуулары ааһан, бүгүн, бэс ыйын 4 күнүгэр, киэһэ 18.00 чааска «Пятница!» ханаалга көстүөхтээх бырайыак финалыгар киирдэ.

Кыыс оҕо эрдэҕиттэн  оҕо дьиэтигэр иитиллибит. Кыра эрдэҕинэ ийэтэ уонна аҕата Лидияны элбэхтик кырбыыллар эбит. 7 сааһыгар кыыһы таайын уола күүһүлээбит. Ийэтин төрөппүт быраабыттан матарбыттар, 11 сааһыгар Лида эдьиийдэрин-балыстарын кытта оҕо дьиэтигэр иитиллибит, ол эрээри кэлин таайдара уонна абаҕалара ылбыттар. Ол кэннэ кини арыгылыыр буолбут.

Бырайыак бастакы күннэриттэн Лидия бэйэтин чаҕылхайдык көрдөрдө уонна факультет старостатын миэстэтин ылла. Ол эрээри, хаста даҕаны кыыс реалити-шоу быраабылаларын кэһэн, арыгыга охтубута. Бырайыак финалыгар Лидия арыгыттан аккаастанан, саҥа олоҕу саҕалыыры ситистэ. Бырайыакка кыттыбытын кэннэ кини муусуканан дьарыктанан, саҥа олоҕу саҕалыыры былаанныыр.