Саха сирэ уонна Беларусь бииргэ үлэлээһини күүһүрдэллэр

СӨ Ил Дархана Айсен Николаев Беларусь Өрөспүүбүлүкэтигэр үлэтинэн сылдьан, эргиэн-экэнэмиичэскэй, инвестиционнай, култуурунай-гуманитарнай уонна спортивнай бииргэ үлэлээһини салгыы сайыннарыыга туһуламмыт кэпсэтиилэри уонна көрсүһүүлэри ыыппыта болҕомтоҕо ылыллар.

Бастакы күн Беларусь Өрөспүүбүлүкэтин экэниэмикэҕэ министиэристибэтин кытта бииргэ үлэлээһини сайыннарыыны дьүүллэстилэр. Көрсүһүүгэ өрүттэр 2028 сылга диэри бииргэ үлэлээһин тутаах хайысхаларын көрдүлэр, ырыттылар. Кооперационнай ситимнэри сайыннарыыга болҕомто уурулунна. Саха сирин ураты айылҕалаах сиригэр-уотугар сөп түбэһэр анал тиэхиньикэни аҕалыы эйгэтигэр улахан кыах бэлиэтэннэ.

Өрүттэр карьерга уонна тыа хаһаайыстыбатыгар үлэлиир тиэхиньикэлэри аҕалыыны элбэтэргэ, ону тэҥэ агропромышленнай комплекска, ОДЬКХ уонна инфраструктураны сайыннарыы эйгэтигэр холбоһуктаах бырайыактары олоххо киллэрэргэ хардарыта интэриэстэрин бигэргэттилэр. Тырааныспар-логистика сибээстэрин салгыы сайыннарыы боппуруостара эмиэ көрүлүннүлэр. 2025 сыллаахха Минскэйгэ «Саха сирин тимир суоллара» хампаанньа бэрэстэбиитэлистибэтэ аһыллыаҕыттан, логистика саҥа схематынан 250 туоннаттан тахса таһаҕас ыытыллыбыт.

Беларусь Өрөспүүбүлүкэтин үпкэ миниистирин солбуйааччы Александр Судниктыын көрсүһүү кэмигэр, Саха сирин баһылыга өрөспүүбүлүкэ инвестиционнай уонна ресурснай кыаҕын билиһиннэрдэ. Саха сирэ алмааһы, көмүһү, үрүҥ көмүһү хостооһуҥҥа Арассыыйаҕа инники күөҥҥэ сылдьара бэлиэтэннэ. Кэпсэтии сүрүн тиэмэтинэн күндү таастары уонна металлары эргитии эйгэтигэр бииргэ үлэлээһини сайыннарыыга туһуланна.

Успуорка бииргэ үлэлээһиҥҥэ болҕомто эмиэ уурулунна. Беларусь Өрөспүүбүлүкэтин Национальнай Олимпийскай кэмитиэтин бэрэсидьиэнэ Виктор Лукашенконы кытта көрсүһүүгэ СӨ Ил Дархана көҥүл тустуу федерацияларын икки ардыларыгар ыкса сибээһи бэлиэтээтэ.

Саха сирин киэн туттар спортсменнара Герман Контоев (2001 с. аан дойду чөмпүйүөнэ) уонна Владислав Андреев (2010 с. аан дойду Кубогын хаһаайына, билигин Беларусь Өрөспүүбүлүкэтигэр көҥүл тустууга ыст. тириэньэр) араас сылларга Беларусь Өрөспүүбүлүкэтин хамаандатыттан кыттыбыттара уонна норуоттар икки ардыларынааҕы күрэхтэһиилэргэ ситиһиилэммиттэрэ. Билигин Беларусь Өрөспүүбүлүкэтин аатыттан Саха сирин спортсменнара Ньургун Скрябин, Андрей Бекренев уонна Арыйаан Тютрин кытталлар.

Айсен Николаев саха национальнай успуордун көрүҥнэригэр тохтоото. Мас-рестлинг уонна хапсаҕай көс олохтоох норуоттар аан дойдутааҕы VI оонньууларын бырагырааматыгар киллэриллибиттэр, онтон аан дойдутааҕы мас-рестлинг федерацията аан дойду 61 дойдутун национальнай федерацияларын түмэр. СӨ Ил Дархана мас-рестлины көҕүлээһиҥҥэ күүһү түмэргэ этии киллэрдэ. Художественнай гимнастикаҕа, чэпчэки атлетикаҕа, хайыһарга уонна хоккейга бииргэ үлэлээһин кэскилин дьүүллэстилэр, тириэньэрдэри атастаһан үлэлэтиини, холбоһуктаах сүүмэрдээһини, күрэхтэһиилэри тэрийиини кэпсэттилэр.

Маны таһынан, Саха сирин баһылыга 2024 сыллаахха «Азия оҕолоро» норуоттар икки ардыларынааҕы спортивнай оонньууларга Беларусь сүүмэрдэммит хамаандатын ситиһиитин бэлиэтээтэ. Саха сирэ Беларусь Өрөспүүбүлүкэтин спортсменнарын «Азия оҕолоро» оонньуулары атын киэбинэн ыытыыга санааларын этэн туран, кыттарга ыҥырбыта.

Сиһилии:https://www.sakha.gov.ru/news/65102