Саха сирэ ититии кэмигэр 70 % бэлэм

Саха Өрөспүүбүлүкэтэ 2026/2027 сыллардааҕы ититии кэмигэр бэлэмнэниитэ былаан быһыытынан салҕанан барар. Билиҥҥи туругунан, өрөспүүбүлүкэ 70 бырыһыан кэриҥэ бэлэм. Бу туһунан Саха сирин Ил Дархана Айсен Николаев «Прямой разговор» биэриигэ иһитиннэрдэ.

«Сорох улуустарга ититии кэмэ номнуо саҕаланна. Холобур, Аллайыаха улууһугар атырдьах ыйын 8 күнүгэр саҕаламмыта», — диэн бэлиэтээтэ Айсен Николаев.

2026/2027 сыллардааҕы ититии кэмигэр бэлэмнэнии чэрчитинэн, өрөспүүбүлүкэҕэ 1 154 хочуолунайы, 4 163 км ититии ситимин, 1 763 км уу ситимин, канализация эбийиэктэрин уонна уот ситимнэрин бэлэмниир үлэ баран иһэр. Навигациянан уматыгы уонна энергетика ресурсаларын таһыыга 277,9 тыһ. туонна таһаҕас тиэйиллэн ыытылынна, ити былааннаммыт кээмэйтэн 53 %-гар тэҥнэһэр. Оттон дизельнэй уматыгы тиэйии 80 %-ны куоһарда — 58,3 тыһ. туонна ыытылынна.

Айсен Николаев чугастааҕы кэмҥэ өрөспүүбүлүкэ улуустара уонна куораттааҕы уокуруктара ититии кэмигэр бэлэмнэрэ туһунан пааспары ылар тэрээһиннэри ааһыахтаахтарын бэлиэтээтэ. «Итибиһиэхэ мэлдьитин ыытыллар үлэ буолар, ол эрээри онтон сылтаан суолтата намтаабат. Маннык боппуруоска эппиэтинэстээх дьон үлэни толору өйдөөн туран оҥороллоругар эрэнэбин», — диэтэ Ил Дархан.

Өрөспүүбүлүкэҕэ бастакынан ититии кэмин «Саха сиринээҕи ОДьКХ» МУП Аллайыахатааҕы филиала саҕалаата — атырдьах ыйын 8 күнүгэр 10 хочуолунай үлэтин саҕалаата. Билигин салгын температуратын кыраапыгар сөп түбэһиннэрэн, этэҥҥэ үлэлии олороллор.

Сиһилии маны баттаан ааҕыҥ: https://www.sakha.gov.ru/news/59330