Саха сирэ уонна Беларусь: Тыа хаһаайыстыбатын тиэхиньикэтин аҕалыы уонна алмааһынан эргинии кэҥиир

Саха сирин Ил Дархана Айсен Николаев Беларусь Өрөспүүбүлүкэтигэр үлэтинэн сылдьан, Гомель уонна Витебскэй уобаластар салайааччыларын кытта көрүстэ. «ИННОПРОМ. Беларусь» быыстапка чэрчитинэн ыытыллыбыт кэпсэтиилэр түмүктэринэн Саха сирэ Гомель уобалаһын кытта сөбүлэҥҥэ илии баттаста, оттон Витебскэйи кытта биисинэс-миссиялары тэрийэр туһунан быһаарыстылар.

Саха сирэ Беларусьтуун эргиэн, экэниэмикэ уонна култуура эйгэтигэр сыһыанын сылтан сыл аайы кэҥэтэн иһэр. Бу сырыыга Ил Дархан Гомель уобалаһын ситэриилээх кэмитиэтин бэрэссэдээтэлэ Иван Крупколуун уонна Витебскэй уобалас салайааччыта Александр Рогожниктыын үлэ хайысхаларын дьүүллэстэ.

Гомель уобалаһа: Тыраахтар уонна ювелирнай эйгэ

Гомель — Беларусь биир саамай сайдыылаах индустриальнай киинэ. Дойду бырамыысыланнай оҥорон таһаарыытын 20%-на уонна тыа хаһаайыстыбатын бородууксуйатын 15%-на бу эрэгийиэҥҥэ оҥоһуллар. Айсен Николаев Гомель уобалаһыттан Саха сиригэр «Гомсельмаш» комбайннарын, тыа хаһаайыстыбатыгар аналлаах тиэхиньикэни, ас-үөл бородууктатын уонна кабеллары аҕалыы кэҥиэн сөбүн бэлиэтээтэ. Итиэннэ алмаас уонна ювелирнай эйгэҕэ бииргэ үлэлээһиҥҥэ ураты болҕомто уурулунна.

Иван Крупко өттүттэн Саха сирин дэлэгээссиэйтин сааскы Гомельдааҕы экэнэмиичэскэй пуорумҥа ыҥырда. «Биһиги эрэгийиэннэрбит икки ардыгар атыы-эргиэн ситимэ сайдарыгар, икки өттүттэн барыстаах бырайыактары өйүүргэ бэлэммит», — диэтэ кини.

Кэпсэтии түмүгүнэн Саха сирин бырабыыталыстыбата уонна Гомель уобалаһын ситэриилээх кэмитиэтэ 2028 сылга диэри бииргэ үлэлэһии былааныгар илии баттастылар. Докумуоҥҥа бырамыысыланнаска, тыа хаһаайыстыбатыгар, алмаас эйгэтигэр уонна патриотическай бырайыактарга чуолкай хаамыылар ыйылланналлар.

Витебскэй уобалаһа: Эти-үүтү аҕалыы уонна устудуьуоннары атастаһыы

Витебскэй уобалас — Беларусь биир бөдөҥ индустриальнай-аграрнай эрэгийиэнэ. Ньиэп, фармоцевтика, чэпчэки бырамыысыланнас уонна тутуу матырыйаалларын оҥорууга дойдуга инники күөҥҥэ сылдьар. Айсен Николаев Витебскэй салайааччыта Александр Рогожниктыын көрсүһүүтүгэр бииргэ үлэлэһии хас да хайысхатын этиитэ:

• Бырамыысыланнас: «Витязь» тэрилтэ бородууксуйатын, ол иһигэр мэдиссиинэ тиэхиньикэтин аҕалыы уонна хотугу усулуобуйаҕа тургутан көрүү.
• Тыа хаһаайыстыбата: Үүт, эт уонна минньигэс аһы-үөлү быһаччы аҕалыы, технологияларынан атастаһыы.
• Гуманитарнай эйгэ: Үрдүк үөрэх кыһаларын икки ардыларыгар устудьуоннарынан атастаһыы, эмчиттэр стажировкалара уонна телемэдиссиинэ.

Ону таһынан, Аҕа дойду Улуу сэриитигэр охтубут дьон сырдык ааттарын үйэтитиигэ уонна ыччаты патриоттуу тыыҥҥа иитиигэ бииргэ үлэлэһии суолтата бэлиэтэннэ. Александр Рогожник Витебскэй уобалаһа Саха сирин кытта быһаччы ситими олохтуурга интэриэстээҕин бигэргэттэ