Саха сирэ уонна Кытай биотехнология уонна биомэдиссиинэ эйгэтигэр каадырдары бэлэмниэхтэрэ

«Акселератор.20» бырайыак чэрчитинэн «Биотехнология уонна биомедицина» хайысхаҕа саҥа каадырдары бэлэмниир былааннанар. Бу туһунан Саха сирин Ил Дархана Айсен Николаев уонна Кытай Норуодунай Өрөспүүбүлүкэтин Цинхуа университетын Арассыыйаны үөрэтэр институтун генеральнай сэкирэтээрэ, тэхиниичэскэй наука кандидата Лю Вэй «Туймаада ыһыаҕын» кэмигэр көрсүһүүлэригэр сөбүлэстилэр.

«Акселератор.20» — Саха сирин биэдэмистибэннэй көҕүлээһинэ, олохтоох исписэлиистэр үөрэҕинэн уонна стажировканан идэлээхтик сайдалларыгар аналлаах былаһаакканы тэрийэргэ туһуланар. Сүрүн болҕомто икки хайысхаҕа ууруллар: технологическай урбааҥҥа уонна информационнай технологияларга.

Айсен Николаев уонна Лю Вэй идэни үрдэтии бырагырааматын иккис сүүмэрдээһинин саҕалыыр кэскилин ырыттылар. Бырагыраама 7 үөрэх муодуллаах, уопсай уһуна 280 академическай чаас. Үөрэх көрүҥэ — сирэйдии-кэтэхтэн, ыраахтан үөрэтэр технологиялары киэҥник туһанан. Сорох муодуллара Дьокуускайга Арассыыйа бастыҥ эспиэртэрин кыттыылаах сирэй көрсөн ыытыллыахтара, оттон атыттара — аан дойдуга бастыҥ үөрэх кииннэрин ахсааныгар киирэр Пекиҥҥэ баар Цинхуа университетын баазатыгар сирэй көрсөн уонна ыраахтан үөрэтэр көрүҥүнэн буолуохтара.

Маны тэҥэ, өрүттэр научнай чинчийиилэр эйгэлэригэр бииргэ үлэлэһиини кэҥэтии кыахтарын кэпсэттилэр. Ол курдук, Цинхуа университета «Самойловскай арыы»  научнай-чинчийэр ыстаансыйатын баазатыгар ыытыллар научнай бырайыактарга кыттыытын боппуруоһа көрүлүннэ.

Билиҥҥи бииргэ үлэлэһии төрүөтүнэн 2024 сыллаахха Уһук Илиҥҥи экэнэмиичэскэй пуорум (ВЭФ) кэмигэр баттаммыт сөбүлэҥ буолар. Докумуон Саха сирэ уонна Цинхуа университетын Арассыыйаны үөрэтэр института үөрэх уонна наука эйгэлэригэр бииргэ ыытыллар бырайыактары сайыннарыыга баҕа санааларын бигэргэппитэ.