Саха сиригэр 2026 сылга уу тырааныспарынан пассажирдары тиэйиини субсидиялааһын икки төгүл улаатта

Саха сиригэр 2026 сылга уу тырааныспарынан пассажирдары тиэйиини субсидиялааһын кээмэйэ икки төгүл улаатта. Бу сыалга 79,24 мөл. солк. көрүлүннэ, бу 2025 сыллааҕар икки төгүл элбэх (37,4 мөл. солк. этэ).

Эрэгийиэннээҕи тырааныспар инфраструктуратын сайыннарыы Арассыыйа Бэрэсидьиэнэ Владимир Путин көҕүлээбит «Олох инфраструктурата» уонна «Тырааныспар көдьүүстээх тиһигэ» национальнай бырайыактарыгар сөп түбэһиннэрэн ыытыллар. Бу үлэҕэ «Биир ньыгыл Арассыыйа» баартыйа норуот бырагырааматын чэрчитинэн, Саха Өрөспүүбүлүкэтин Ил Дархана Айсен Николаев салайар эрэгийиэннээҕи салаата ураты болҕомтону уурар.

«Саха сирин оройуоннарын уратыта оннук, навигация кэмигэр уу суола ардыгар соҕотох баар суолунан буолар. Субсидия икки төгүл улааппыта, биллэн турар, олус үөрдэр», — диэн бэлиэтиир Саха сирин олохтооҕо Алексей Соркомов.

2026 сыллааҕы навигация кэмигэр субсидияланар хайысхалар: Дьокуускай — Өлүөхүмэ, Дьокуускай — Сангаар, Ленскэй — Өлүөхүмэ, Уус-Куйга — Нижнеянскай, Томмот — Белькачи.

Маны тэҥэ, быйылгыттан «Ленатурфлот» ХЭТ оннугар пассажирдары түргэн суудуналарынан («Валдай», «Метеор», «Ракета», «Полесье») «ЛОРП» тиэйиэҕэ.

Ааспыт сылга социальнай суолталаах хайысхаларынан аҕыс лииньийэнэн 171 рейс оҥоһуллубута, 52 тохтобул пууна хабыллыбыта. 10 292 пассажиры тиэйбиттэрэ, ол иһигэр 5 687 киһи субсидияламмыт билиэтинэн.

Саха Өрөспүүбүлүкэтин Сыана бэлиитикэтин судаарыстыбаннай кэмитиэтэ ыам ыйын 18 күнүнээҕи 8 №-дээх бирикээһинэн, Саха Өрөспүүбүлүкэтин социальнай суолталаах хайысхаларынан өрүс тырааныспарынан пассажирдары тиэйии тарыыбын ыстаапкатын бигэргэттэ. Тарыып ыстаапката былырыыҥҥытааҕар 15% үрдээтэ. Бигэргэммит ыстаапка  муҥутуур улахан буолар уонна таһаҕас тиэйээччилэр бэйэлэрин тарыыптарын олохтуулларыгар ыйынньыгынан буолар. Холобур, «Дьокуускай — Өлүөхүмэ» лииньийэтигэр муҥутуур улахан тарыып 10 973 солк. тэҥнэстэ (2025 сылга — 9 530 солк.).

Бу туһунан Саха Өрөспүүбүлүкэтин Ил Дарханын уонна Бырабыыталыстыбатын дьаһалтатын пресс-сулууспата иһитиннэрэр.