Саха сиригэр «Аҕа дойдуну көмүскээччилэр» пуонда филиала юридическай көмөнү оҥорор

Саха сиригэр «Аҕа дойдуну көмүскээччилэр» судаарыстыбаннай пуонда филиала үлэлиэҕиттэн — 2023 сыл бэс ыйын 1 күнүттэн — 2801  юридическай көмө оҥоһулунна, онтон 1553-э — пуонда көрүүтүгэр-истиитигэр баар дьон боппуруостарынан. Бу туһунан брифинг кэмигэр филиал салайааччытын быраапка солбуйааччыта Александр Захаров иһитиннэрдэ.

Үлэ сүрүн хайысхата — байыаннай дьайыы бэтэрээннэригэр, өлбүт уонна сураҕа суох сүппүт байыаннай сулууспалаахтар дьиэ кэргэттэригэр, ону тэҥэ билигин сулууспалыы сылдьар байыаннайдарга уонна кинилэр аймахтарыгар босхо юридическай көмөнү оҥоруу. Ордук элбэхтик киирэр боппуруостар: федеральнай төлөбүрдэр, судаарыстыбаннай наҕараадаларга төлөбүрдэр, нэһилиэстибэни ылыы болдьоҕун чөлүгэр түһэрии, иитээччитин сүтэрбитинэн биэнсийэ, юридическай чахчылары (аҕа буолууну, иитиллээччи буолууну, бииргэ олорууну) бигэргэтии, дьиэ кэргэн уонна баай-дуол мөккүөрдэрэ.

Филиалга араас исписэлиистэр дьону көрөр-истэр тиһиктэрэ тэрилиннэ. Борокуратуура байыаннай борокуруору кытта бииргэ ый аайы (иккис уонна төрдүс бээтинсэҕэ) дьону көрөр. «МФЦ»  юрисконсула сэрэдэ уонна бээтинсэ күннэргэ сүбэ-ама биэрэр. Албакааттар бэнидиэлинньиккэ үлэлииллэр. Ону тэҥэ Киһи быраабын боломуочунайа уонна Юристар ассоциациялара үлэлииллэр. Саха сирин Юстицияҕа судаарыстыбаннай кэмитиэтин көмөтүнэн кэмиттэн кэмигэр Быраап көмөтүн күннэрэ ыытыллаллар.

Приемҥа суруттарыы социальнай координатордар нөҥүө барар. Кыһалҕалар тустарынан иһитиннэрии байыаннай дьайыы  кыттыылаахтарын өйүүр биэдэмстибэлэр икки ардыларынааҕы хамыыһыйаҕа уонна судаарыстыбаннай уорганнарга ыытыллар. Сураҕа суох сүппүтүнэн, өлбүтүнэн биллэрии уонна харчынан хааччыллыы боппуруостарын албакааттар быһаараллар.

Александр Захаров бэлиэтээбитинэн, МФЦ юрисконсуллара уонна албакааттар гражданнар уонна юридическай сирэйдэр моҥкуруут буолууларыгар, холуобунай уонна административнай быраабы кэһии дьыалаларыгар босхо юридическай көмөнү оҥорботтор.

Саха сиринээҕи Албакааттар балааталарын иһинэн Дьокуускайга, Нерюнгрига, Алдаҥҥа уонна Мииринэйгэ босхо көмө кииннэрэ үлэлииллэр. Филиал Судаарыстыбаннай суут бириистэптэрин сулууспатын  уонна Нотариальнай балаатаны кытта бииргэ үлэлиир. Улуустарга көмөнү социальнай координатордар суругунан сайаапкаларынан оҥороллор.