Саха сиригэр аграрийдар наука ситиһиилэрин көхтөөхтүк киллэрэн эрэллэр

2025 сылга Саха сирин аграрийдара үүнүүнү ылыыга улахан ситиһиилэннилэр. Үүнээйини үүннэрии хас да хайысхатыгар гектартан 15 центнер хомулунна. Маннык көрдөрүү эрэгийиэҥҥэ 20 сыл устата бэлиэтэммэтэҕэ.

Ситиһии халлаан туруга табыгастаах буолуутуттан уонна олохтоох наука ситиһиилэрин көхтөөхтүк туһаныыттан таҕыста. Бу туһунан Айсен Николаев «Прямой разговор» биэриитигэр кэпсээтэ.

«Ааспыт сылга биһиги үүнээйини үүннэриигэ уонна туорахтаах култуураларга хас да уон сыллар усталарыгар бастыҥ көрдөрүүлэри ситистибит. Сайына үчүгэй этэ. Ол гынан баран, саамай сүрүнэ — биһиги аграрийдарбыт, учуонайдарбыт оҥорбут оҥоһуктарын, дьэ, көхтөөхтүк туһанан эрэллэр. ЯНИИСХ (Саха сиринээҕи тыа хаһаайыстыбатын научнай-чинчийэр института) биһиги тыйыс усулуобуйабытыгар сөп түбэһэр суортары таһаарар. Пиэрмэрдэр олору үүннэрэн барбыттара, олус үчүгэй түмүгү биэрдэ», — диэн Ил Дархан бэлиэтээтэ.

Кини 2030 сылга диэри тыа хаһаайыстыбатын сайыннарыы бырагырааматын чэрчитинэн аһылык баазатын хаачыстыбатыгар ураты болҕомто уурулларын эттэ. Сүөһү иитиитигэр бородууксуйаны үрдэтэр туһугар сииктээх уонна иҥэмтэлээх аһылык өлүүтүн улаатыннарыы былааннанар. Айсен Николаев этэринэн, Тыа хаһаайыстыбатын министиэристибэтэ бу соруктары түргэнник олоххо киллэриигэ үлэтин саҕалаабыт.

Маны таһынан, Чурапчы улууһугар агротехническай дьаһаллары ыытыыга агродроннары туһаныы пилотнай бырайыага саҕаланна.

«Ситиһиилээхтик олоххо киирдэҕинэ, бу бырайыагы өрөспүүбүлүкэ үрдүнэн тарҕатыахпыт диэн эрэллээхпин», — диэн Айсен Николаев түмүктээтэ.

Бу туһунан Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата иһитиннэрэр.

Сиһилии: https://www.sakha.gov.ru/news/48139