Саха сиригэр быйыл 7 саҥа сынньалаҥ сирэ үлэҕэ киириэ

Быйыл Саха сиригэр Уһук Илин эрэгийиэннэригэр анаммыт куорат эйгэтин тупсарыыга Бүтүн Арассыыйатааҕы куонкурус III уонна IV түһүмэхтэрин кыайыылаахтара — сэттэ улахан бырайыак олоххо киирэр. Куораттарбыт уонна сэлиэнньэлэрбит тупсалларыгар, киэркэйэллэригэр анаммыт үлэлэр ханна ыытыллалларын сиһилии ааҕыҥ.

Саҥа пааркалар уонна искибиэрдэр ханна баар буолалларый?

• Мииринэй уонна Аллараа Бэстээх киин пааркалара;
• Өлүөхүмэ куоратыгар «Үйэлэр кирбиилэригэр» (На рубеже веков) сквер;
• Томмот уонна Хаандыга өрүс кытыллара (набережнайдара);
• Уус Маайаҕа Алдан өрүс кытылын тупсарыы иккис түһүмэҕэ;
• Аммаҕа «Тэтим» мини-паарка.

Үлэ хайдах бара турарый?

Атырдьах ыйын ортотун туругунан, Аллараа Бэстээхтээҕи киин паарка бастакы уочарата 100 бырыһыан бэлэм буолбут. Оттон Өлүөхүмэҕэ искибиэр үлэтэ 90 бырыһыан бүппүт. Билигин манна сүрүн үлэлэр түмүктэнэн, таһырдьа киинэ көрөргө аналлаах павильон тутулла турар.

Бу куонкурус Арассыыйа Бэрэсидьиэнэ Владимир Путин көҕүлээбит «Олоххо-дьаһахха туһалаах инфраструктурата» национальнай бырайыак чэрчитинэн ыытыллар. Маны таһынан «Биир ньыгыл Арассыыйа» баартыйа норуодунай бырагырааматын соруктарыгар эппиэттиир.

Инники былааннар уонна устуоруйа

Саха сирэ куонкуруска салгыы көхтөөхтүк кыттар. 2026 сылга өрөспүүбүлүкэттэн V түһүмэххэ 17 сайаапка киирбитэ, онтон 6 бырайыак кыайыылааҕынан ааттанна. Бу саҥа эбийиэктэр 2027 сылтан тутуллуохтара.

Санаттахха, Бүтүн Арассыыйатааҕы куонкурус 2018 сылтан ыытыллар. Бу кэм иһигэр Саха сирэ барыта 33 кыайыыны ситистэ уонна федеральнай бүддьүөттэн 2,245 миллиард солкуобайы ылбыта. Ол түмүгүнэн үгүс пааркалар, искибиэрдэр уонна кытыллар тутулуннулар. Холобур, Бүлүү куоратыгар «Ыллыыр кумахтар» кытыл уонна Томокко Алдан өрүһү үөһэттэн көрөр кэрэ көстүүлээх былаһаакка олоххо киирбиттэрэ.