Саха сиригэр быйыл «дьахтар сайына» хаһан буоларый?

Дьон-сэргэ уһун тымныы кыһын иннинэ кэлэр кылгас сылаас күннэри — норуокка биллэринэн «дьахтар сайынын» долгуйа күүтэр. Быйылгы күһүн хайдах буолуоҕай уонна өрөспүүбүлүкэбитигэр сылаас күннэр хаһан эргиллиэхтэрэй? Метеорологтар сабаҕалааһыннарын билиһиннэрэбит.

«Дьахтар сайына» диэн тугуй?

Синоптиктар быһааралларынан, «дьахтар сайына» чопчу күнэ-дьыла быһаарыллыбатах, айылҕа бэйэтин ураты көстүүтүнэн буолар. «Дьахтар сайына» диэн сайын бүтүүтүгэр эбэтэр күһүн саҥатыгар халлаан биллэрдик тымныйбытын кэннэ соһуччу сылыйан, кураан уонна күннээх халлаан туруута ааттанар.

Сүрүн уратыта — маннык кэм хайаан даҕаны күһүҥҥү бастакы тымныйыы (температура +5…+10 °C кыраадыска диэри түһүүтүн) кэнниттэн кэлэр. Метеорологтар этэллэринэн, ити кэмҥэ күүстээх антициклон үөскээн, сөҥүүлээх циклоннары киллэрбэт. Ол аата, кыһын дьиҥнээхтик сабардаан киириэн иннинэ, айылҕа бүтэһик сылааһын бэлэхтиир.

Быйылгы күһүн уратылаах буолуо

Гидрометкиин сабаҕалыырынан, быйылгы күһүн кэлиҥҥи сылларга саамай таайыллыбат, уларыйыылаах кэминэн буолуон сөп. Уһук Илин, Сибиир, Урал уонна дойду атын да федеральнай уокуруктарыгар күн-дьыл туруга соһуччу уларыйыаҕа — күүстээх тыал, сөҥүү түһэрэ күүтүллэр.

Оттон Уһук Илиҥҥэ, ол иһигэр Саха сиригэр, балаҕан ыйын саҥатыттан халлаан биллэрдик тымныйыа. Синоптиктар билгэлииллэринэн,  күн-дьыл туруга эрэгийиэннэргэ ураты буолуоҕа, холобур, өрөспүүбүлүкэбит хотугу улуустарыгар тымныы кэм олус түргэнник саҕаланыан сөп.

Сылаас күннэри хаһан күүтэбитий?

Норуот билгэлэрэ барыта үйэлээх кэтээн көрүүлэргэ олоҕураллар, ол эрээри чопчу метеорологическай сабаҕалааһыннар буолбатахтарын умнумуохха наада. Ол да буоллар, норуот билгэтигэр уонна килиимэт уратыларыгар олоҕуран, быйыл «дьахтар сайына» балаҕан ыйын иккис дэкээдэтигэр (балаҕан ыйын 10-15 күннэригэр) күүтүллэр.

Онон, балаҕан ыйын саҥатыгар түһэр тымныылартан хомойумаҥ, халлаан сылыйан, күһүҥҥү сылаас күннэринэн үөрдүөҕэ!