Саха сиригэр дроннар эми-тому уонна биоматериаллары тиэрдэн саҕалаатылар

Саха сиригэр эми-тому уонна биоматериаллары тиэрдэр «МедБПЛА» инновационнай бырайыак олоххо киирэн саҕаланна. Бу саҥа көҕүлээһини Ил Дархан Айсен Николаев муус устар 14 күнүгэр, оптуорунньукка, Дьокуускай куоракка өрөспүүбүлүкэ мэдиссиинэ уопсастыбатын кытта көрсүһүүтүн кэмигэр саҕалаата.

Бастакы рейс Хаҥалас улууһугар оҥоһулунна. Саха сирин Баһылыга биэрбит бэлиэтинэн, биоматериаллардаах пилота суох көтөр аппараат (БПЛА) Өктөм сэлиэнньэтин амбулаториятыттан Покровскай куораттааҕы киин балыыһа төрөтөр дьиэтигэр диэри көттө. Бу түгэни видео-сибээһинэн көрдөрдүлэр. БПЛА-ны көтүтүү РФ Бэрэсидьиэнэ Владимир Путин көҕүлээһининэн дойдуга олоххо киирэр «Беспилотнай көтөр системалар национальнай бырайыак чэрчитинэн ыытылынна.

«Биһиги киэҥ-куоҥ, айанныырга уустук, дьыл кэминэн хааччахтардаах уонна логистиката уустук өрөспүүбүлүкэбитигэр маннык быһаарыылар ураты суолталаахтар. Бу бырайыак суолтата Саха сирин таһынан даҕаны киэҥник тарҕаныаҕа диэн эрэллээхпин. Тырааныспар сырыыта уустук сирдэригэр маннык ньымалар мэдиссиинэ саҥа моделынан буолуохтарын сөп. Саамай сүрүнэ — маннык технологиялар дьоҥҥо-сэргэҕэ түргэнник туһалаан саҕалыахтаахтар: быраастарга көмөлөһүөхтээхтэр, диагноз туруорар кэми кылгатыахтаахтар уонна көмөнү ордук чугас, дөбөҥнүк ылыллар оҥоруохтаахтар», – диэн Айсен Николаев бэлиэтээтэ.

Хаҥалас улууһун киин балыыһатын кылаабынай бырааһа Артур Протодьяконов видео-сибээс нөҥүө кэпсээбитинэн, Өктөмнөөҕү амбулатория территориятыгар таһаҕастаах беспилотниктары көтүтэр анал дронодром оҥоһуллубут.

«Бу — өрөспүүбүлүкэ доруобуйатын харыстабылын устуоруйатыгар  таһаҕастары таһарга дроннары туһанар бастакы бырайыак буолар», – диэн улуустааҕы балыыһа кылаабынай бырааһа эттэ.

«МедБПЛА» инновационнай бырайыак Саха сирин уонна сир-уот уратыларын учуоттаан, мэдиссиинэ үлэтин-хамнаһын тупсарыыгауонна мэдиссиинэ өҥөтүн таһымын үрдэтиигэ туһаайыллар. Инникитин бырайыагы атын улуустарга тэнитиэхтэрэ, ону тэҥэ пилота суох көтөр технологиялары араас эйгэлэргэ киэҥник туһаныахтара диэн былааннанар.

Маннык быһаарыылары олоххо киллэрэргэ уонна тарҕатарга сүрүн тирэх буолар «Полярнай» пилота суох авиационнай системалар билим-оҥорон таһаарар кииннэрин сайыннарыыга ураты болҕомто ууруллар. Сиһилии: https://www.sakha.gov.ru/news/44180