Саха сиригэр гаас уматык инфраструктуратын сайыннарыы үлэтэ салҕанар

Дьокуускай куоракка уопсастыбаннай тыраансыпар наадыйыытын хааччыйарга автоматизированнай гааһынан толорор компрессорнай ыстаансыйаны тутуу былааннанар. Бу туһунан СӨ Баһылыгын уонна Бырабыыталыстыбатын дьаһалталарын социальнай ситимнэригэр быһа эпиир кэмигэр СӨ бырамыысыланнаска уонна геологияҕа миниистирин эбээһинэһин толорооччу Михаил Кириллин иһитиннэрдэ.

«Бастатан туран, Дьокуускай куорат уокуругар автоматизированнай гааһынан толорор компрессорнай ыстаансыйаны тутуу былаана баарын иһитиннэриэхпин баҕарабын. Бу, биллэн турар, Дьокуускйадааҕы пассажирдары таһар тырааныспар хампаанньатыгар (ЯПАК) наада. Кэлиҥҥи сылларга метаҥҥа, компримированнай айылҕа гааһынан сылдьар оптуобустар ахсааннара элбээтэ. Ол быһыытынан инфраструктураны кэҥэтиигэ наадыйыы баар. ЯПАК былаанынан быйылгы сылга бэлэмнэнии үлэтэ саҕаланыа: сир учаастагын оҥоруу, бырайыактыыр докумуоннары бэлэмнээһин. Бырайыагы олоххо киллэрии, куорат уокуруга иһитиннэрбитинэн, 2027 сылга былааннанар», — диэн Михаил Кириллин бэлиэтээтэ.

Кини бүгүн газомоторнай уматык сүрүн инфраструктурата Дьокуускайга түмүллүбүтүн тоһоҕолоон бэлиэтээтэ. Инникитин инфраструктураны сайыннарыы үлэтэ өрөспүүбүлүкэ илин эҥээр уонна соҕуруу оройуоннарыгар, ону тэҥэ ситим гааһа баар атын улуустарга салҕанан барыаҕа.

Дьокуускай куоракка газомоторнай уматыгынан хайыы-үйэ 551 оптуобус айанныыр. Өрөспүүбүлүкэ киин куората газомоторнай уматык ырыынагын сайдыытын таһымынан инники күөҥҥэ сылдьар. Манна 30-тан тахса гаас сапыраапката үлэлиир. Саха сиригэр уопсайа 56 массыына гаас сапыраапкалыыр ыстаансыйа уонна 10 массыынаны гааһынан толорор компрессорнай ыстаанысйа баар.

2026 сыл саҕаланыаҕыттан газомоторнай уматыкка 150 тырааныспар көһөрүллүбүт. Эрэгийиэҥҥэ бүгүҥҥү күҥҥэ уопсайа 20 тыһыынчаттан тахса массыына гааһы туһанар.

Сиһилии: https://www.sakha.gov.ru/news/52636