Саха сиригэр Күн өлүүтүн ханна көрүөххэ сөбүй?

Арассыыйатааҕы Билим академиятын Сибиирдээҕи салаатын Космофизикаҕа уонна аэрономияҕа институтун дириэктэрин солбуйааччы Семен Николашкин Саха сирин олохтоохторо атырдьах ыйыгар буолуохтаах Күн уонна Ый өлүүлэрин көрөр кыахтарын туһунан кэпсээтэ.

«Киин оройуоннарынан олохтоохторо атырдьах ыйын 12 күнүгэр буолар Күн өлүүтүн көрөр кыахтара суох, тоҕо диэтэххэ бу бириэмэҕэ Саха сиригэр Күн киирэр. Ол эрээри, дьикти көстүүнү сорҕотун Аллараа Халыма улууһун олохтоохторо көрүөхтэрин сөп — Күн тахсыытыгар, олохтоох бириэмэнэн түүн 3:20 чаас саҕана, халлаан туруга үчүгэй буоллаҕына. Оттон атырдьах ыйын 22 күнүгэр буолуохтаах Ый өлүүтүн Саха сирин бары улуустарыгар эмиэ көстүө суоҕа», — диэн учуонай быһааран биэрдэ.

Онон, өрөспүүбүлүкэ олохтоохторун үксэ ити икки астрономическай көстүүнү көрбөттөр. Биир эрэ ураты баар — Аллараа Халыма улууһугар, халлаан ыраас буоллаҕына, Күн тахсыытыгар Күн өлүүтүн сорҕотун көрүөххэ сөп.