Саха сиригэр нэдиэлэ иһигэр үһүс төгүлүн сир хамсаата

Муус устар 24 күнүгэр сарсыарда 06:58 чааска Нерюнгри улууһугар сир хамсааһына бэлиэтэннэ. Бу туһунан Арассыыйатааҕы билим академиятын (РАН) Геофизика сулууспатын Саха сиринээҕи филиалын үлэһиттэрэ иһитиннэрдилэр. Бу нэдиэлэ иһигэр бэлиэтэммит үһүс сейсмическэй хамсааһын буолар.

Сейсмологтар дааннайдарынан, бүгүҥҥү сир хамсааһынын киинэ Нерюнгри куораттан соҕуруулуу-арҕаа диэки 48 км ыраах сиргэ бэлиэтэммит. Сир аннынааҕы хамсааһын күүһэ MSK-64 шкалатынан 3–4 баалга тэҥнэстэ, оттон магнитудата — 3,0.

Санатабыт, бу нэдиэлэ иһигэр Саха сиригэр үһүс сир хамсааһына буолар:

• Муус устар 19 күнэ — Өлүөхүмэ улууһугар 5–6 бааллаах сир хамсааһына;
• Муус устар 21 күнэ — Уус-Майа улууһугар (Ааллаах Үүн бөһүөлэгиттэн хоту диэки 78 км ыраах сиргэ) 3–4 бааллаах, 3,0 магнитудалаах сир хамсааһына.

Сир хамсааһыныттан эмсэҕэлээбит дьон суох.