Саха сиригэр Судаарыстыбаннай Дуума дьокутааттарын талыы салҕанар

Саха сирин олохтоохторо өрөспүүбүлүкэ кэскилин туһугар көхтөөхтүк куоластыыллар. Бастакы күн түмүгүнэн, быыбардааччылар 23,72%-ра кытынна. Саха сиринээҕи Киин быыбардыыр хамыыһыйа дааннайынан, өрөспүүбүлүкэҕэ быыбардар улахан кэһиилэрэ суох ааһаллар.

Саха сирин олохтоохторо дойду парламеныгар кинилэр интэриэстэрин биэс сыл устата көмүскүүр дьону талалларын салгыыллар. Үгүс эспиэртэр өрөспүүбүлүкэҕэ да, Уһук Илин бүттүүнүгэр да быыбардааччылар көхтөөхтүк кытталларын бэлиэтииллэр. Кинилэр санааларынан, дьон билиҥҥи быыбарга интэриэстэрэ хас да биричиинэлээх. Бастатан туран, Арассыыйа уопсастыбатын сомоҕолоһуутун уонна түмсүүлээҕин көрдөрөөрү, быыбарга көхтөөхтүк кытталларыгар Бэрэсидьиэн ыҥырыытын дойду олохтоохторо истибиттэр. Саха сирин олохтоохторо социальнай ситимнэргэ Бэрэсидьиэн бэлиитикэтин уонна дойду сомоҕолоһуутун өйүүллэрин туһунан иһитиннэриилэри таһаараллар. Иккиһинэн, Саха сирин уонна Уһук Илин атын эрэгийиэннэрин олохтоохторугар быыбарга кыттыылара олус олохтоох төрүөттээх. Кинилэр эрэгийиэннэрэ салгыы сайдарын уонна дьон олоҕо тупсарын туһугар куоластыыллар.

«Уһук Илин — Бэрэсидьиэн стратегиялаах чугастааҕы 10 сылга сайдыыга соҕотох эрэгийиэн. Бу докумуону быыбар буолуон икки нэдиэлэ иннинэ Бырабыыталыстыба илии баттаабыта. Стратегияны ырытыыга Уһук Илин бары эрэгийиэннэриттэн 3 тыһыынчаттан тахса киһи кытынна. Манна дьону ордук долгутар боппуруостар сүрүн тирэх буоллулар. Стратегия быыбардааччылар көхтөрүн Саха сиригэр да, Уһук Илин федеральнай уокурукка да сүнньүнэн быһаарда. Өскөтүн дойду үрдүнэн дьон араас баартыйалар бэрэстэбиитэллэрин талар буоллахтарына, Уһук Илин олохтоохторо эрэгийиэннэрэ салгыы сайдарын туһугар куоластыыллар», — диэн ХИФУ проректора, тас үөрэх үлэтигэр уонна ыччат бэлиитикэтигэр эппиэттээх, ректорат аппараатын салайааччыта Александр Ильин этэр.

Санатар буоллахха, Саха сиригэр Судаарыстыбаннай Дуума дьокутааттарын талыы 2026 сыл балаҕан ыйын 20 күнүгэр диэри салҕаныаҕа. Саха сиригэр билигин 780-тан тахса учаастактааҕы быыбардыыр хамыыһыйа үлэлиир. Быыбардааччыларга табыгастаах буоларын туһугар быстах учаастактардааҕы хамыыһыйалар эмиэ тэриллибиттэр.