Суоллары тутуу рекорднай көрдөрүүлэрин ситиһии федеральнай өйөбүл көмөтүнэн оҥоһуллар

2026 сылга Саха сирин кыра куорат холбоһугунан 12 км тахса суол саҥардыллыа диэн СӨ тырааныспарга министиэристибэтэ иһитиннэрэр.

Бу үлэлэр Арассыыйа Бэрэсидьиэнэ Владимир Путин көҕүлээбит «Олох инфраструктурата» национальнай бырайыак чэрчитинэн ыытыллаллар уонна «Биир ньыгыл Арассыыйа» баартыйа норуот бырагырааматын соруктарын толороллор.

2025 сылтан суол национальнай бырайыага Саха сирин түөрт кыра куоратыгар – Алдаҥҥа, Ленскэйгэ, Мииринэйгэ уонна Нерюнгрига 20 тыһыынчаттан тахса нэһилиэнньэлээх сирдэргэ аан бастаан тарҕанна. Ааспыт сезоҥҥа суол үлэһиттэрэ былааны аһары толорон, 9 км оннугар 12 км тахса суолу туттардылар. Ол түмүгэр, олохтоох суоллар нуормаҕа эппиэттиир бырыһыаннара 59%-ҥа тэҥнэстэ. 2025 сылга бу тэрээһиннэри олоххо киллэриигэ 548 мөл. солк. көрүллүбүтэ.

2026 сылга өрөспүүбүлүкэҕэ суол өрөмүөнүн үрдүк тэтимҥэ тутуохтара. Бырагыраамаҕа уопсай уһуна 12 км тахса 13 эбийиэк киирдэ. Сыл түмүгүнэн түөрт агломерацияҕа нормативнай суоллар бырыһыаннара 63%-ҥа диэри улаатыахтаах. Суол үлэлэрин үбүлээһин 882,5 мөл. солк. тэҥнэһиэ.

Өрөмүөн хампаанньата куораттар сүрүн уулуссаларын хабыа. Алдаҥҥа Мегино-Кангаласскай, Ортосалинскай уонна Зинштейн уулуссаларыгар хапытаалынай өрөмүөн ыытыллыа. Ленскэйгэ Пионерскай, Дзержинскэй уонна Кыайыы уулуссатын икки учаастага саҥардыллыа. Мииринэйгэ 50 лет Октября, Московскай уонна Солдатов уулуссаларыгар үлэлэр ыытыллыахтара. Нерюнгрига Строителей, Пионернай уонна Тимптонскай уулуссалары өрөмүөннүөхтэрэ.

«Биһиги номнуо уларыйыыны көрөбүт – куоракка айан быдан табыгастаах уонна куттала суох буолла. Ордук үөрдэрэ диэн, күн аайы дьон айанныыр, оҕолор сылдьар, оптуобустар сылдьар уулуссалара өрөмүөннэнэр. Бу олохтоохторго чахчы олус суолталаах», — диэн Ленскэй олохтооҕо Ольга Иннокентьева санаатын үллэстэр.