Саха сиригэр туристар ахсааннара 300 тыһыынчаҕа чугаһаата

«Туризм уонна ыалдьытымсах буолуу» национальнай бырайыагынан Саха сиригэр туристар сырыыларын сыллааҕы былаана үгүс өттө туолла. Ону тэҥэ, өрөспүүбүлүкэҕэ саҥа оскуолалары тутуу уонна саҥардыы үлэтэ күүскэ барар.

СӨ Бырабыыталыстыбатын Бэрэссэдээтэлин солбуйааччы Анатолий Семенов бэлиэтээбитинэн, туризм эйгэтигэр көрдөрүү үчүгэй. «2026 сылга 300 тыһыынча турист кэлиэхтээх диэн былааннаабыппыт. Алтынньы 10 күнүнээҕи туругунан бу көрдөрүү номнуо 298,6 тыһыынчаҕа тиийдэ. Хаамыыта олус үчүгэй, сыалбытын-сорукпутун толоруохпут диэн эрэллээхпит», — диэтэ кини.

Анатолий Семенов куратордыыр алта национальнай бырайыагын чэрчитинэн 11 эрэгийиэннэҕи бырайыак олоххо киирэр. Ол иһигэр биир сүрүн хайысханан «Ыччат уонна оҕолор» бырайыак буолар. Бу бырайыагынан үөрэх тэрилтэлэригэр хапытаалынай өрөмүөн барар уонна саҥа оскуолалар тутуллаллар.

Ол курдук, Мэҥэ Хаҥаласка Маатта орто оскуолата уонна Нам улууһугар Фрунзетааҕы начаалынай оскуола-уһуйаан өрөмүөннэнэн бүтэн, оҕолор саҥардыллыбыт дьиэҕэ үөрэнэ киирдилэр.

Ону таһынан, икки сыл устата өрөмүөннэнэр алта оскуолаҕа быйылгы былааннаммыт үлэ барыта туолла. Ол иһигэр: Өлүөхүмэҕэ Урицкай, Уус Майаҕа Солнечнай, Томпоҕо Хаандыга, Муомаҕа Соболоох, Мииринэйгэ 23-с №-дээх уонна Уус Алдаҥҥа Курбуһах оскуолалара бааллар.

Оскуолаларга муусука, уруһуй уонна физика кэбиниэттэрин саҥардыы тэҥҥэ барар. Наадалаах аныгы тэриллэр Дьокуускайга кэлбиттэр уонна билигин улуустарынан тарҕатыллаллар.

Киин куоракка үс саҥа үөрэх кыһатын тутуута салҕанар: 500 миэстэлээх Физико-тэхиниичэскэй лиссиэй, 275 миэстэлээх 17-с №-дээх орто оскуола уонна Чайковскай уулуссатыгар 360 оҕоҕо аналлаах оскуола.

Анатолий Семенов иһитиннэрбитинэн, Өрөспүүбүлүкэ Бырабыыталыстыбата Дьокуускай куорат дьаһалтатын кытта тутууга тахсар боппуруостары бииргэ быһаараллар, бары үөрэх эбийиэктэрин болдьоммут кэмигэр үлэҕэ киллэрэр туһугар кыаллары барытын оҥороллор.