Саха сиригэр ураты бырайыак – АБДь кыттыылаахтарыгар анаммыт реабилитациялыыр-үөрэтэр десант олоххо киирэр

Өрөспүүбүлүкэҕэ анал байыаннай дьайыы кыттыылаахтарыгар, бойобуой дьайыылар бэтэрээннэригэр уонна кинилэр дьиэ кэргэттэригэр анаммыт ураты бырайыак — реабилитациялыыр-үөрэтэр десант үлэтэ салҕанар.

«Мин маннык ураты бырайыакка бастакыбын кыттабын. Тэрийиититтэн олус астынным, ордук түмэллэри сөбүлээтим. Санаабыт көтөҕүллэн, саҥа күүһү-уоҕу ылан кэллибит. Биһигини умнубаттара, кыһаллаллара, бэтэрээннэргэ уонна кинилэр дьиэ кэргэттэригэр маннык наадалаах көҕүлээһиннэри оҥороллоро олус улахан суолталаах. Тэрийээччилэргэ – Чурапчытааҕы судаарыстыбаннай физкултуура уонна успуорт институтугар, социальнай координатор Сергей Атласовка уонна биһигини кытта бииргэ сылдьыбыт бары дьоҥҥо ис сүрэхпиттэн махтанабын», – диэн АБДь бэтэрээнэ Лена Макарова махтанна.

Биэс хонукка суоттаммыт десант айана өрөспүүбүлүкэ хас да улууһун хапта. Бу кэм иһигэр кыттыылаахтар уйулҕа туругун чөлүгэр түһэриини, төрөөбүт дойду култууратын, устуоруйатын кытта билсиһиини уонна истиҥ кэпсэтиини дьүөрэлээбит ис хоһоонноох бырагырааманы аастылар. Ол курдук, десант чэрчитинэн Чурапчытааҕы физкултуура уонна успуорт институтун (ЧГИФКиС) дьаһалтатын үлэһиттэрэ уонна «Боотур» байыаннай-патриотическай кулууп бэрэстэбиитэллэрэ кыттыылаах «Аныгы уопсастыбаҕа патриотизм: судаарыстыба, үөрэхтээһин уонна гражданскай сектор бииргэ үлэлээһиннэрэ» диэн төгүрүк остуол ыытылынна.

Маны таһынан, психологтары кытта көрсүһүүлэр, биирдиилээн сүбэлэһиилэр уонна рефлексиялар тэрилиннилэр. Ону кытта улуустааҕы түмэллэргэ, ол иһигэр Д.П. Коркин музейыгар, Гулаг музейыгар уонна Чөркөөхтөөҕү түмэлгэ сырыттылар. Духуобунай өттүгэр ураты болҕомто уурулунна: Чурапчыга кыттыылаахтар Арчы дьиэтигэр тиийэн, Арчылааһын сиэригэр-туомугар кытыннылар. Айан суола Кыйы, Чөркөөх, Мэҥэ-Алдан уонна Хаандыга нэһилиэктэрин ааста.

Айан муҥутуур чыпчаалынан Өймөкөөн улууһун Хорутуу күөлүгэр уонна Индигиир өрүскэ тиийии буолла. Онно бэтэрээннэри Чысхааны кытта көрсүһүү, балыктааһын уонна кутаа тула чуумпу киэһэлэр күүттүлэр. Бу барыта психологтыын үлэнэн  түмүктэннэ. Десаҥҥа кыттыбыт дьон тэрээһин таһыма үрдүгүн уонна айан устата ураты истиҥ эйгэ баар буолбутун бэлиэтээтилэр. Кинилэр этэллэринэн, бу айан сынньанарга уонна эйгэни уларытарга эрэ буолбакка, ис туругу чөлүгэр түһэрэргэ, саҥа күүһү-уоҕу ыларга уонна өйөбүлү билэргэ көмөлөстө.  Бырайыагы Чурапчытааҕы судаарыстыбаннай физкултуура уонна успуорт института (ЧГИФКиС) тэрийдэ. Оттон бырайыагы бастакынан өйөөбүт дьон ортолоругар — Чурапчы улууһун социальнай координатора Сергей Атласов баар.

Сиһилии: https://www.sakha.gov.ru/news/65673