Саха сиригэр VIII Ойуур бырамыысыланнаһын пуорума ыытыллар

Ыам ыйын 28 күнүгэр Арктикатааҕы судаарыстыбаннай агротехнологическай университет (АГАТУ) баазатыгар Саха Өрөспүүбүлүкэтин VIII Ойуур бырамыысыланнаһын пуорумун үлэтэ саҕаланна.

Саха Өрөспүүбүлүкэтин Бырабыытылыстыбатын бэрэссэдээтэлин солбуйааччы Ольга Балабкина тэрээһин кыттыылаахтарын эҕэрдэлээн туран, пуорум «от күөх» чэппиэргэ арыллыбыта ураты суолталааҕын бэлиэтээтэ. Чуолаан бу күн Экологияҕа министиэристибэтин көҕүлээһининэн дьону уонна тэрилтэлэри айылҕаны харыстыыр үлэҕэ сыһыарарга, тулалыыр эйгэҕэ харыстабыллаахтык сыһыаннаһарга уонна экологическай култуураны үрдэтэргэ аналлаах аахсыйалар, тэрээһиннэр ыытыллаллар.

Саха сиригэр ойууру чөлүгэр түһэрии хайысхатын куратора Ольга Балабкина РФ Бэрэсидьиэнэ Владимир Путин көҕүлээһининэн олоххо киирэр «Экология» нацбырайыак уонна «Ойууру харыстааһын» бырайыак чэрчилэринэн ситиһиллэрин бэлиэтээтэ.

«2019 сылтан Саха сиригэр кэриэтэ 1 мөл. гектар ойуур чөлүгэр түһэрилиннэ. 2024 сыллаахха Саха сирэ 203 тыһыынчаттан тахса гектар ойууру чөлүгэр түһэрэн, Арассыыйаҕа бу көрдөрүүгэ бастакы миэстэни ылла. Сэттэ сыл иһигэр федеральнай бүддьүөт үбүнэн ойуур баһаарын умуруорар 175 тиэхиньикэ уонна 180 тэрил атыылаһылынна, бу саха тайҕатын баһаартан көмүскээһини биллэ күүһүртэ. Ааспыт сылга билим үлэһиттэрин кытта икки судаарыстыбаннай ойуур питомнигын тэрийдибит. Маны туһанан сыл аайы 250 гектартан тахса иэннээх сиргэ ойууру чөлүгэр түһэрии үлэтин ыытыахпыт. Инникитин Саха сирин ойуурун 80 %-нын ылар тиити үүннэрэр былааннаахпыт. Саха сирин Ил Дархана Айсен Николаев «Саха Өрөспүүбүлүкэтин экологиятын 2030 сылга диэри этэҥҥэ буолуутун туһунан» стратегическай ыйааҕар сөп түбэһиннэрэн, сыл аайы аҥаар мөлүйүөнтэн итэҕэһэ суох олордорго бэлэмнэммит кыра мастары үүннэрэр икки улахан питомнигы тэрийэр былааннанар», – диэтэ вице-премьер Ольга Балабкина.

Пуорумҥа ойуур хаһаайыстыбатыгар уонна ойуур бырамыысыланнаһыгар туһаныллар саҥа, бастыҥ тиэхиниичэскэй уонна технологическай быһаарыылары билиһиннэриэхтэрэ.

Сиһилии: https://www.sakha.gov.ru/news/50628