Саха сирин биир кэлим сыыппара чат-бота MAX мессенджергэ олохтоохторго номнуо көмөлөһөр

Өрөспүүбүлүкэҕэ MAX мессенджергэ үлэлиир «Биир кэлим эрэгийиэннээҕи сервис» чат-бот судаарыстыбаннай уонна уопсастыбаҕа суолталаах онлайн-сервистэргэ киирэр сүрүн сыыппара сервиһинэн буолла. Саҥа үнүстүрүмүөн өрөспүүбүлүкэ саамай наадалаах ресурсаларын биир сиргэ түмэр уонна олохтоохтор наадалаах иһитиннэриини түргэнник булалларыгар, өҥөнү электроннай көрүҥүнэн ылалларыгар номнуо көмөлөһөр.

Маннык сыыппара быһаарыыларын олоххо киллэрии Арассыыйа Бэрэсидьиэнэ Владимир Путин көҕүлээбит «Экономика данных» национальнай бырайыагын, ону тэҥэ Саха сирин Ил Дархана Айсен Николаев «Креативнай экэниэмикэни сайыннарыы туһунан» стратегическай ыйааҕын сыалларын-соруктарын толорууга туһуланар.

Чат-бот Саха сирин сыыппара сервистэрин биир кэлим витринатын курдук үлэлиир. Кини нөҥүө туһанааччылар судаарыстыбаннай уорганнар официальнай саайтарыгар киириэхтэрин, анал чат-боттарынан уонна мини-сыһыарыыларынан туһаныахтарын, биэдэмистибэлэр официальнай ханаалларын арыйыахтарын уонна наадалаах электроннай формалары толоруохтарын сөп. Сервистэр биир сиргэ түмүллүүлэрэ наадалаах иһитиннэриини көрдүүр бириэмэни кэмчилиир уонна олохтоохтор судаарыстыбаннай, муниципальнай өҥөлөрү ылалларын быдан табыгастаах оҥорор.

«Бүгүн Саха сиригэр сыыппара сервиһэ олус элбэх, онон дьон наадалаах ресурсаны түргэнник булара улахан суолталаах. MAX мессенджергэ баар «Биир кэлим эрэгийиэннээҕи сервис» чат-бот саамай көрдөнөр сервистэри биир сиргэ түмэн, сыыппара экосистематын навигаторынан буолла», – диэн Саха сирин Инновацияҕа, сыыппара сайдыытыгар уонна инфокоммуникационнай технологияларга миниистирэ Петр Николаев бэлиэтээтэ.

Өрөспүүбүлүкэ олохтоохторо саҥа сервиһинэн номнуо көхтөөхтүк туһаналлар. Чат-бот нөҥүө судаарыстыбаннай уонна сыыппара өҥөлөрүн, официальнай ханааллары, анал сервистэри уонна мини-сыһыарыылары түргэнник булуохха сөп. Ордук бырааска суруттарыы функцията үрдүк дьон болҕомтотун тарта — үлэлиэҕиттэн ити өҥөнөн 117 тыһыынчаттан тахсата туһаммыттар. Ону таһынан больничнай лииһи ыраахтан олорон сабыы кыаҕа эмиэ элбэхтик көрдөнөр.

«Урут наадалаах сервиһи араас саайтартан уонна биэдэмистибэлэр ханаалларыттан көрдүүр буоларбыт. Оттон билигин барыта биир сиргэ түмүллэ сылдьар — MAX мессенджери арыйаҕын, чат-бокка киирэҕин уонна наадалаах өҥөнү түргэнник булаҕын. Олус табыгастаах, ордук боппуруоһу суһаллык быһаарар кэмҥэ», – диэн Дьокуускай куорат олохтооҕо Роман Иванов санаатын үллэһиннэ.

Урбаанньыт Мария Андреева этэринэн, сервис — олус туһалаах уонна дьиҥнээхтик наадалаах, саайтарынан, сыһыарыыларынан көрдүүргэ бириэмэни бараабатыгар күүс-көмө буолар.

МАХ национальнай мессенджергэ Саха сирин Ил Дарханын уонна Бырабыыталыстыбатын официальнай ханааллара эмиэ үлэлииллэр.

• Саха сирин Ил Дархана Айсен Николаев: https://max.ru/aisen_nikolaev
• Саха Өрөспүүбүлүкэтин Бырабыыталыстыбата: https://max.ru/sakhagov

Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата.