Саха сирин дэлэгээссийэтэ “Точка сборки. Чукотка” ыччат пуорумугар кыттыаҕа

Саха сирин дэлэгээссийэтэ “Точка сборки. Чукотка” ыччат пуорумугар Анаадырга атырдьах ыйын 10-14 күннэригэр кыттыаҕа. Онно устудьуоннар, волонтердар, эдэр урбаанньыттар, социальнай көҕүлээһиннэр ааптардара, “Движение Первых” актыбыыстара киирдилэр.

“Чукотка – күүстээх эйгэлээх, ураты айылҕалаах эрэгийиэн. Манна уопут атастаһыам диэн эрэнэбин. Бүгүн Уһук Илин уонна Арктика тэтимнээхтик сайдаллар, ыччат манна улахан оруоллаах. Миэстэтигэр туох көҕүлээһиннэри киллэрэллэрин билиэхпин баҕарабын. Бу көрсүһүү саҥа бырайыактары саҕыа диэн эрэнэбин”, — диэтэ Саха сириттэн пуорум кыттыылааҕа Денис Рожков.

Саха сирин олохтооҕо Айна Куртц пуорумҥа эдэрдэр Уһук Илин көхтөөх дьонун кытта билсиһиэхтэрэ диэн эрэнэр. “Билиини, саҥа идиэйэлэри ыларым тэҥэ маны бэйэм бырайыактарбар туһаныам. Хоту дойду култууратын дириҥник билиэхпин баҕарабын. Чукотка миэхэ – каартаҕа эрэ баар эрэгийиэн буолбатах, бу улахан кыахтаах сир-уот”, — диэтэ Айна Куртц.

“Точка сборки. Чукотка” түөрт хайысханан үлэлиэҕэ:  “Среда и путешествия”, “Культура и творчество”, “Работа и возможности”, ону тэҥэ “Добровольчество и патриотизм”.

Кыттааччылары кытта 31 эспиэр уонна спикер үлэлиэҕэ. Ураты болҕомто байыаннай дьайыы кыттыылаахтарын уонна кинилэр дьиэ кэргэттэрин өйөөһүнү кытта сибээстээх көҕүлээһиннэргэ ууруллуоҕа. “Сотору Саха сирин 19 талааннаах ыччата уокуруктааҕы пуорумҥа барыаҕа. Эдэрдэр сүрүн эпсиэрдэри, Уһук Илин эрэгийиэннэрин ситиһиилээх уопуттарын билсиэхтэрэ диэн эрэнэбин”,— диэтэ Саха Өрөспүүбүлүкэтин ыччат дьыалаларыгар уонна социальнай коммуникацияларга миниистирэ Пётр Шамаев.

Сиһилии: https://www.sakha.gov.ru/news/58516