Саха сирин дизайнердара улахан подиумҥа тахсыахтара

Дьокуускайга  «Үлэ кыбаартала» креативнай кластерга сэтинньи 7-8 күннэригэр Саха сиринээҕи Муода нэдиэлэтэ ыытыллыаҕа. Олохтоох дизайнердарга уонна саҥа брендэргэ бэйэлэрин үлэлэрин киэҥ эйгэҕэ көрдөрөргө ураты кыах бэриллэр.

Тэрээһин сүрүн түгэнинэн сэтинньи 8 күнүгэр буолар улахан муода көрдөрүүтэ буолуоҕа. Бу күн сырдык уоттаах подиумҥа таҥаһы бэйэлэрэ айан тигэр дьон, саҥа сайдан эрэр олохтоох брендэр уонна муода маҕаһыыннарын бэрэстэбиитэллэрэ саҥа кэллиэксийэлэрин дьон-сэргэ дьүүллүүрүгэр таһаарыахтара.

«Бу, бастатан туран, улахан былаһааккаҕа тахсан бэйэни билиһиннэрэргэ, киэҥ эйгэҕэ таҥаскын-сапкын көрдөрөргө уонна профессиональнай таһымҥа тахсарга ураты кыах буолар. Биһиги таҥас тигиинэн, ону тэҥэ бэйэ дьыалатын сайыннарыынан дьарыктанар дьону барыларын күһүҥҥү сүрүн муода тэрээһинигэр кытталларыгар уонна үлэлэрэ подиумҥа хайдах көстөрүн көрөллөрүгэр ыҥырабыт», — диэн тэрээһин тэрийээччилэрэ иһитиннэрэллэр.