Саха сирин хампаанньалара үлэһиттэригэр оҕолоннохторуна төһө харчыны төлүүллэрий?

Саха сирин элбэх тэрилтэлэригэр дьиэ кэргэннээх үлэһиттэри өйүүр үтүө үгэс олохтонно. Ол курдук, оҕо төрөөтөҕүнэ эбэтэр иитэ ыллаҕына биир кэмнээх материальнай көмө оҥоһуллар. Төлөбүр кээмэйин хампаанньалар бэйэлэрэ быһаараллар.

Маннык иһитиннэрии муус устар 23 күнүгэр Дьокуускай куорат уопсастыбаннай киинигэр буолбут панельнай сессияҕа оҥоһулунна. Тэрээһин Өрөспүүбүлүкэтээҕи үлэни харыстааһын ыйын чэрчитинэн ыытылынна.

Мунньахха бэлиэтээбиттэринэн, тэрилтэлэр үлэһиттэригэр улахан материальнай көмөнү оҥороллор:

• «Алмазы Анабара» АУо хас да сыл устата оҕо төрөөтөҕүнэ үлэһиттэригэр 50 тыһыынча солкуобайы төлүүр.
• «Сахатранснефтегаз» АУо быйылгы тохсунньу 1 күнүттэн оҕоломмут үлэһитигэр 150 тыһыынча солкуобайы биэрэр.
• Оттон «Саха сирин тимир суоллара» АУо бу сыалга биир мөлүйүөн солкуобайы көрөр. Ону таһынан, өскөтүн бу хампаанньаҕа оҕо ийэтэ да, аҕата да тэҥҥэ үлэлиир буоллахтарына, бу төлөбүр хас биирдиилэригэр тус-туспа бэриллэр.

Санатар буоллахха, Арассыыйа бэрэсидьиэнин ыйаахтарын уонна «Дьиэ кэргэн» национальнай бырайыагы олоххо киллэрэр сыалтан, 2025 сыл бэс ыйыгар «Корпоративнай демографическай стандарт» бигэргэтилиннэ. Бу стандарт хампаанньалар дойду демографиятын туругун тупсарыыга кыттыһалларын көҕүлүүргэ уонна үлэһиттэр дьиэ кэргэттэрин өйүүргэ ананар.

Бырайыак үлэһиттэр үлэлииллэригэр табыгастаах усулуобуйаны тэрийэргэ, доруобуйаларын харыстыырга, оҕолоноллорун, элбэх оҕолоох буолалларын көҕүлүүргэ уонна дьиэ кэргэн сыаннастарын харыстыырга туһаайыллыбыт бастыҥ корпоративнай бырагыраамалары тарҕатар соруктаах.