Саха сирин иһигэр көтүүгэ субсидиялааһын салҕаныаҕа

Айан-сырыы боппуруоһа куруук болҕомтоҕо тутуллар. Онон өрөспүүбүлүкэ үгүс олохтоохторо СӨ Ил Дархана Айсен Николаев бүгүҥҥү “Быһа лииньийэтигэр” бу боппуруоска тугу этэрин иһиттилэр.

Көтөр аалынан олохтоох хайысхаларга тиэйиигэ  субсдиялааһын бырагыраамата оннунан хаалыаҕа. Билигин кэлэр 2027 сылга Саха сирин бүддьүөтэ торумнанар, итиннэ сөптөөх үбүлээһин көрүллүөҕэ.

“Кэлэр сылга субсидиялаах билиэттэргэ быйылгытааҕар кырата суох, өссө элбэх даҕаны көрүллүөҕэ диэн быһаарыы ылынныбыт. Мин Бырабыыталыстыбаҕа сорук туруордум: бүддьүөтү иккис ааҕыыга авиа-тиэйиилэри булгуччу болҕомтоҕо ыларга. Бырабыыталыстыба бу сорудаҕы толоруо диэн эрэнэбин”, — диэтэ Айсен Николаев.

Бу боппуруос Уһук Илин бары эрэгийиэннэригэр олус судургута суоҕун ыйда. Онуоха кини Саха сиригэр 1 миллиард солк. кэриҥэ наадатын бэлиэтээтэ. Манна даҕатан эттэххэ, Ил Дархан Айсен Николаев авиация боппуруоһугар анаммыт  Арассыыйа Бэрэсидьиэнин сүбэ мунньаҕар Уһук Илин эрэгийиэннэрин аатыттан тыл эппит. Онно эрэгийиэн иһинээҕи субсидиялааһыны таарыйбыт. “Үгүс олохтоохторго авиация эрэгийиэн киинигэр кэлэргэ соҕотох көрүҥүнэн буолар. Биһиэхэ атыттарга курдук тимир суол, массыына суола баар  атын солбукпут  суох. Бэрэсидьиэн биһиги этиибитин өйөөтө. Онон бу боппуруос билигин Арассыыйа Бырабыыталыстыбатыгар дьүүллэһиллэр. Кэккэ  сорудахтарга сотору илии баттаныаҕа”, — диэтэ Саха сирин баһылыга.

Хаартыска: Сахагов

Сиһилии: https://www.sakha.gov.ru/news/64552