Саха сирин исписэлиистэрэ Докучаевскай куорат 11 эбийиэгин чөлүгэр түһэриэхтэрэ

2026 сылга Докучаевскай куораты чөлүгэр түһэрии былааныгар 11 эбийиэк киирбит. Билигин сэттэ эбийиэккэ үлэ барар. Манна 80 киһи уонна 6 тиэхиньикэ кыттар.

Бу туһунан РФ Бырабыыталыстыбатын Бэрэссэдээтэлин солбуйааччы – РФ Бэрэсидьиэнин УИФУо боломуочуйалаах бэрэстэбиитэлэ Юрий Трутневка Саха сирин оробуочай бөлөҕүн салайааччыта Анатолий Алексеев иһитиннэрдэ.

Докучаевскайга Юрий Трутнев Оҕо айымньытын дьиэтин уонна Ыччат киинин көрдө-иһиттэ.  Саха сирин исписэлиистэрэ бу дьиэлэр тас өттүлэрин хапытаалынайдык өрөмүөннээбиттэр, түннүктэрин уларыппыттар, коммуникациятын саҥардыбыттар уо.д.а. Бу эбийиэктэр 96% бэлэм буолбуттар.

Салгыы Еленовка куораттыы тииптээх бөһүөлэккэ 2 №-дээх оскуолаҕа Юрий Трутнев сырытта. Үйэ аҥаарын анараа өттүгэр тутуллубут оскуола ВСУ өттүттэн ытыалааһынтан улаханнык энчирээбит. Быйыл манна хапытаалынай өрөмүөнү толору кээмэйинэн ыыталлар. “Бу сыл бүтүүтэ бүтэриэхпит. Ол эрээри оҕолорго бу оскуола олус суолталааҕын өйдөөн, болдьоҕун иннинэ сэтинньи ыйга түмүктүүр соруктаахпыт”, — диэтэ Анатолий Алексеев.

Докучаевскайга айти-кииннээх ыччат киинин хапытаалынай өрөмүөнэ бүтүөҕэ.  Билигин онно аактовай саала үрдүн, сценаны уонна видеокэтээн көрүүнү оҥороллор.  Андреевскайдааҕы духуобунай сайдыы киинэ эмиэ өрөмүөннэнэр. “Уу турбатын, суоллары уонна тротуардары өрөмүөннээһин үлэтин сайын бүтэриэхпит”, — диэн Анатолий Алексеев эбэн эттэ.

Докучаевскайга  Саха сирин эмчиттэрэ үлэлээн, быйыл 42 эпэрээссийэни оҥордулар. Билигин манна өрөспүүбүлүкэ балыыһатын хирург-бырааһа үлэлиир. “Шефтэһэр эрэгийиэммитин кытта дьиҥнээхтик доҕордуу сибээс олохтонно. Боппуруостарбыт суһаллык быһаарыллаллар. Биһиги – биир дойдубут, биир норуоппут!”, — диэтэ Докучаевскай куорат баһылыга  Александр Качанов.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспатын саайтыттан/