Саха сирин кииһин тириитигэр туруулаһыы үрдүүр

Кэнники сыллары кытта тэҥнээтэххэ, Саха сирин  булчуттара күндү түүлээх сыаната эмискэччи үрдээбитин бэлиэтииллэр. Урукку сылларга киис тириитин сыаната 2-3 тыһыынча солкуобайтан үрдээбэт эбит буоллаҕына, билигин балаһыанньа тосту уларыйда.

Быйыл кулун тутар ыйга Санкт-Петербург куоракка ыытыллыбыт күндү түүлээх норуоттар икки ардыларынааҕы аукционугар 192 тыһыынча киис тириитэ туруоруллубутуттан 98,4%-на атыыга барбыт. Күндү түүлээх хаачыстыбатыттан көрөн, ортотунан биир киис тириитигэр 340  доллары (быһа холоон 26 200 солк.) биэрбиттэр.

Санаттахха, бу туһунан Экология, айылҕаны туһаныы уонна ойуур хаһаайыстыбатын миниистирин солбуйаччы Николай Додохов «Саха» НКиХ «Тэтим» араадьыйатын «Диалог с властью» биэриитин быһа эпииригэр иһитиннэрбитэ.

«Билигин аукциоҥҥа күндү түүлээҕи сүрүннээн Кытай бэрэстэбиитэллэрэ бөдөҥ баартыйанан атылаһаллар. Оттон урут Грецияттан уонна Италияттан сылдьар эргинээччилэр ордук көхтөөхтөрө. Хантан да кэлбиттэрин иһин, киискэ наадыйыы эмиэ күүскэ үрдээн эрэр. Бу биһиги булчуттарбытыгар, саха дьонугар олус үчүгэй сонун», — диир Николай Додохов.

Миниистири солбуйаччы этэринэн, бүгүҥҥү күҥҥэ Саха сиригэр күндү түүлээҕи соҕотуопкалаан баран салгыы атыыга таһаарар 300-тэн тахса хаһаайыстыба үлэлии-хамсыы олорор. Инньэ гынан, саха бастыҥ түүлээҕэ аан дойду таһымыгар эмиэ үрдүктүк сыаналанан эрэриттэн булчуттар эрэллэрэ улаатар.