Саха сирин олохтоохторун Уһук Илин сайдыытын 10 сыллаах Стратегиятын оҥорууга кыттарга ыҥыраллар

Стратегическай докумуону дьүүллэһии https://dfostrategy.vostokgosplan.ru саайтка арылынна. РФ Бэрэсидьиэнэ Владимир Путин 2025 сыллааҕы Илиҥҥи экэнэмиичэскэй пуорум түмүгүнэн Уһук Илин федеральнай уокурук 2030 сылга диэри (2036 сылга диэри өтө көрүүлээх) социальнай-экэнэмиичэскэй сайдыытын саҥа Стратегиятын оҥорорго сорудахтаабыта.

«РФ Бэрэсидьиэнин сорудаҕынан биһиги Уһук Илин 2030 сылга диэри социальнай-экэнэмиичэскэй сайдыытын саҥа Стратегиятын оҥоруохтаахпыт уонна атырдьах ыйын 1 күнүгэр диэри бигэргэтиэхтээхпит. Урукку стратегияны олоххо киллэрии түмүгүнэн биһиги үчүгэй көрдөрүүлэри ситистибит. Уон сыл иһигэр УИФУ төрүт хапытаалыгар инвестиция 286% үрдээтэ, бу Арассыыйа орто көрдөрүүтүн лаппа куоһарар. Биһиги саҥа стратегияны ылыныахтаахпыт. Бу стратегия уочараттаах хардыынан эрэ буолбакка, үлэни салгыырын таһынан, үлэ көдьүүһүн үрдэтэр, эрэгийиэннэргэ буолар уларыйыылары көҕүлүүр уонна, бастатан туран, дьон олоҕун тупсарар үнүстүрүмүөнүнэн буолуохтаах», – диэн  Юрий Трутнев иһитиннэрдэ.

2036 сылга диэри стратегияны бэлэмнээһининэн Уһук Илин сайдыытын министиэристибэтэ, «Востокгосплан» ФАУ, Уһук Илин уонна Арктика сайдыытын Корпорацията федеральнай былаас уорганнарын уонна УИФУ эрэгийиэннэрин баһылыктарын кытта бииргэ үлэлээн ыыталлар.

«Биһиги өрөспүүбүлүкэбит — Уһук Илин түмүк эрэгийиэнэ, онон кэлэр стратегия олоҕор бүттүүн Саха сирин сайдыытын быһаарар дьиҥнээх сорудахтар уонна быһаарыылар киирэллэрэ улахан суолталаах. Өрөспүүбүлүкэ күүстээх экэниэмикэлээх, дьоһун научнай уонна үөрэхтээһин кыахтаах, улахан бырайыактары олоххо киллэриигэ уопуттаах. Бу барыта Уһук Илин сайдыытын саҥа Стратегиятыгар учуоттаныахтаах», — диэн Саха сирин Ил Дархана, «Биир Ньыгыл Арассыыйа» баартыйа Саха сиринээҕи эрэгийиэннээҕи салаатын сэкирэтээрэ Айсен Николаев бэлиэтээтэ.

УИФУ сайдыытын Стратегиятын бырайыага Арассыыйа Бырабыытылыстыбатын көрүүтүгэр от ыйын 15 күнүгэр диэри киириэхтээх. РФ Владимир Путин сорудаҕынан, докумуон атырдьах ыйын 1 күнүгэр диэри бигэргэтилиэхтээх.

Докумуону дьүүллэһэр туһуттан «Востокгосплан» тэрилтэ dfostrategy.vostokgosplan.ru саайты үлэлэттэ. Саайтка манныктары булуохха сөп:

• Уһук Илин федеральнай уокурук 2030 сылга диэри (2036 сылга диэри өтө көрүүлээх) социальнай-экэнэмиичэскэй сайдыытын Стратегиятын бырайыагын толору тиэкиһин;
• УИФУ эрэгийиэннэригэр стратегияны дьүүллэһиигэ аналлаах тэрээһиннэр испииһэктэрин;
• Стратегия эрэгийиэннээҕи блоктарын туһунан иһитиннэриини;
• УИФУ олохтоохторуттан этиилэри хомуйар форманы;
• УИФУ сайдыытын тиэмэтигэр ыйытыгы.

Баҕалаах дьон бары бэйэлэрин көҕүлээһиннэрин уонна этиилэрин «Востокгосплан» көрүүтүгэр ыам ыйын 31 күнүгэр диэри ыытыахтарын сөп.

Сиһилии: https://www.sakha.gov.ru/news/46614