Саха сирин судьуйаларын квалификационнай кэллиэгийэлэрин уопсастыба бэрэстэбиитэллэрэ ананнылар

Бүгүн Ил Түмэн пленранай мунньаҕар өрөспүүбүлүкэ судьуйаларын квалификационнай кэллиэгийэтигэр уопсастыба бэрэстэбиитэллэрин аныыр туһунан сокуон бырайыага көрүлүннэ.

Бу боппуруоска дакылааты Ил Түмэн бэрэссэдээтэлин солбуйааччы – Судаарыстыбаннай тутулга уонна сокуону оҥорууга сис кэмитиэт бэрэссэдээтэлэ Афанасий Владимиров билиһиннэрдэ. Саха Өрөспүүбүлүкэтин судьуйаларын квалификационнай кэллиэгийэтигэр уопсастыба бэрэстэбиитэлэ болдьоҕо ааспытынан сибээстээн, быйыл олунньу 19 күнүгэр түөрт аһаҕас миэстэ тахсыбыт. Онно хандьыдааттарга докумуону биэрии болдьоҕо кулун тутар 23 күнүгэр буолбута.

Судаарыстыбаннай тутулга уонна сокуону оҥорууга сис кэмитиэт көрүүтүгэр кулун тутар 24 күнүгэр икки кандидатурата киирбит: Арассыыйа Сэбилэниилээх сүүстэрин бэтэрээннэрин Бүтүн Арассыыйатааҕы уопсастыбаннай тэрилтэ Саха сиринээҕи салаата туруорбут Николай Иванов уонна «Үһүс көлүөнэ оскуолата» туруорбут Ньургун Тимофеев.

Бу икки хандьыдаат олохтоммут ирдэбилгэ сөп түбэһэллэрин уонна туһааннаах уорганнартан үчүгэй сыанабыл киирбитин дьокутааттар эттилэр. Норуот дьокутааттара биир санаанан кинилэри Саха сирин судьуйаларын квалификационнай кэллиэгийэлэрин уопсастыба бэрэстэбиитэллэринэн аныыр иһин куоластаатылар.