Саха сирин сүүрүгэ Татьяна Артемьева — 100 км дистанцияҕа Арассыыйа чөмпүйэнээтин боруонса призера

Саха сирин спортсменката Татьяна Артемьева 100 килэмиэтиргэ сүүрүүгэ Арассыыйа чөмпүйэнээтин боруонса мэтээлин хаһаайкатынан буолла диэн «Триумф» пресс-сулууспата иһитиннэрэр.

Кини финишкэ 7:42:20 көрдөрүүлээх тиийдэ. Иккис миэстэҕэ Мария Меньшикова-Горская (7:28:23) таҕыста, оттон дойду чөмпүйүөнүн аатын Ирина Шевченко (7:23:15) сүктэ. Татьянаны үрдүк ситиһиитинэн, мэтээлинэн итиитик-истиҥник эҕэрдэлиибит!

Саха сирин өссө биир бэрэстэбиитэлэ — Елена Бурнашева 7:52:22 бириэмэлээх түмүгүнэн дойду биэс бастыҥ сүүрүгүн ортотугар киирдэ.

Бэлиэтээн эттэххэ, 100 км — көннөрү уһун дистанция эрэ буолбатах, бу киһи тулуурун, дьоҕурун дьиҥнээх тургутуута буолар. Манна эт-хаан өттүнэн бэлэмнээх буолуу эрэ ирдэммэт, манна дьулуур, тулуур уонна бэйэ күүһүн-уоҕун сөпкө аттаран туһанар сатабыл олус улахан суолталаах. Саха сирин спортсменкалара өрөспүүбүлүкэ чиэһин Бүтүн Арассыыйа таһымыгар чиэстээхтик көмүскээтилэр — кинилэр көрдөрүүлэрэ дьону көҕүлүүр уонна дьулуурдаах буолуу хайаан да кыайыыга тиэрдэрин дакаастыыр.