«Саханефтегазсбыт» тэрилтэ уматыгы 100% тиэйдэ
«Саханефтегазсбыт» АУо 100 бырыһыан былаанын толорон, тэрилтэ бары филиалларыгар уматыгы тиэртэ диэн хампаанньа пресс-сулууспата иһитиннэрэр.
«Уматыгы биэрээччилэр өттүлэриттэн тиэйиигэ тардыллыы, муора учаастагар уонна арктическай өрүстэргэ уустук килиимэт усулуобуйалара — быйыл уу таһыма олус намыһах уонна өрүстэр эрдэ уолан хаалан, кэккэ тас биричиинэлэр баалларын үрдүнэн, «Саханефтегазсбыт» АУо уматыгы аҕалыы былаанын толордо. Биһиги өрөспүүбүлүкэ нэһилиэнньэтин, олоҕу-дьаһаҕы хааччыйар уонна социальнай инфраструктура сүрүн эбийиэктэрин, ол иһигэр арктическай улуустары, наадалаах уматык саппааһынан хааччыйдыбыт. Билигин массыына суола официальнайдык аһыллыбытын кэнниттэн уматыгы массыына суолунан аҕаларга бэлэмнэнэбит», — диэн тэрилтэ генеральнай дириэктэрэ, норуот дьокутаата Виктор Лебедев бэлиэтээтэ.
«Саханефтегазсбыт» АУо кэлэктиибин былааннаах үлэтин түмүгэр, уматык ыскылааттарыгар диэри 114 тыһыынчаттан тахса туонна уматык тиэрдилиннэ. Мантан 16,3 тыһыынча туонна Хотугу муора суолунан, 93,2 тыһыынча туонна Иркутскай уобалас Уус-Кут куоратын ыскылааттарыттан, ону тэҥэ 4,5 тыһыынча туонна депонационнай саппаастартан суһаллык ыытылынна.
Быйылгы навигация тэрилтэ логистарыттан ураты суһал быһаарыылары ирдээтэ. Ол курдук, оҥорор собуот уматыгы хойутатан биэрбитинэн, Ньурбатааҕы нефтебаазаттан Сунтаар сэлиэнньэтин ньиэп ыскылаатын хааччыйарга суһаллык массыына суолунан тиэйэргэ тиийиллибитэ. Ленскэйдээҕи нефтебаазаттан бензовоһунан 2 400 туонна уматык тиэйиллибитэ.
Уопсайынан, «Саханефтегазсбыт» АУо бары уматык ыскылааттара навигация кэмигэр 354 тыһыынча туонна уматыгы харайыыга ыллылар. Ону таһынан, магистральнай уматык ситиминэн Өлүөхүмэтээҕи нефтебааза ньиэп ылар пуунугар (ПОН) 64,6 тыһыынча туонна ньиэп киирдэ, мантан 51,9 тыһыынча туонната «СӨ ОДьКХ» ГУП хочуолунайдарын наадаларыгар тиэйилиннэ.
Уруккуттан тиэйиитэ-таһыыта уустук хотугу улуустарга ураты болҕомто ууруллар. Уус-Куйгатааҕы нефтебааза дириэктэрэ Юрий Николаев быһаарбытынан, Усуйаана улууһугар навигация күн-дьыл туругуттан уонна да атын биричиинэлэртэн тутулуктаах. Ол эрээри, филиал уматыгы тутууну түмүктээн, сырдык уонна хараҥа ньиэп бородууктатын наадалаах кээмэйин саппааһын хаччыйда.
Белогорскай нефтебааза дириэктэрэ Гаврил Ефимов эбэн эппитинэн, Индигиркаҕа навигация кэмэ 2026 сылга гидрологическай быһыы-майгы уонна күн-дьыл дьалхааныттан олус тыҥааһыннаахтык ааста. Ол эрээри, онно даҕаны былааннаммыт уматык кээмэйэ баахтарга кутулунна.
Инньэ гынан, «Саханефтегазсбыт» АУо салаалара — Чокуурдаах, Зырянка, Орто Халыма, Аллараа Халыма, Нижне-Янскай, Жатай, Сангаар, Ленскэй, Уус-Куйга, Белогорскай, Эльдика, Өлүөхүмэ нефтебаазалара 2027 сылга сайыҥҥы навигация аһыллыар диэри уматык саппааһынан хааччылыннылар.
Оттон Сунтаар, Муома улууһугар Хонуу уонна Баатаҕай, Хаандыга, Ньурба, Дьокуускай нефтебаазалара массыына суола аһыллыар диэри уматык саппааһынан хааччылыннылар. Аллараа Бэстээх уонна Томмот нефтебаазаларын саппаастара ый аайы тимир суолунан уматык кэлэринэн, толоруллан иһэр.
Сиһилии: https://www.sakha.gov.ru/news/67681
Сообщить об опечатке
Текст, который будет отправлен нашим редакторам: