Сайыҥҥы халаантан Саха сирин алта улууһугар оттооһун хампаанньата уустугурда

Ардахтан өрүстэргэ уу таһыма үрдээн, Саха сирин алта улууһугар оттооһун хампаанньата уустугурда. Билигин исписэлиистэр тыа хаһаайыстыбатыгар оҥоһуллубут хоромньуну сыаналыыллар. Бу туһунан «Якутия 24» телеханаал «Актуальное интервью» биэриитигэр Өрөспүүбүлүкэ Тыатын хаһаайыстыбатын миниистирэ Артем Александров иһитиннэрдэ.

«Уустук балаһыанньа алта улууска, олор истэригэр хотугу — Эбээн-Бытантай уонна Дьааҥы улуустарыгар бэлиэтэнэр. Бүгүҥҥү күҥҥэ хоромньу кээмэйэ ааҕыллар, уу өссө да түһэ илик: оттуур сирдэр уу анныгар сыталлар. Бэлэмнэммит от, ону тэҥэ кытыл сирдэргэ охсуллубут от ууга барда. Билигин хоромньуну сыаналыыр үлэ бара турар, үлэлэр бары муниципальнай оройуоннарга ыытылыннылар», — диэтэ Артем Александров. «Бу балаһыанньаттан тахсыахпыт диэн эрэнэбит. Сүрүн сорукпут — ааспыт сыллардааҕы оту уонна  от саппааһын ааҕан туран, ааспыт сыллааҕы кээмэйгэ тиийии», — диэтэ кини.

Уу таһыма үрдээбит улуустарыгар сүөһүнү үрдүк сирдэргэ уонна дьиэ таһынааҕы тиэргэннэргэ үүрэллэр. Барыллаан сабаҕалааһынынан, өрөспүүбүлүкэ үрдүнэн уопсайа 402,4 тыһыынча туонна от бэлэмнэнэрэ күүтүллэр.

От ыйын 24 күнүн сарсыардааҥҥы туругунан, ардах уута киирэн Дьокуускайга, Өлүөхүмэҕэ, Сунтаарга, Дьааҥыга уонна Эбээн-Бытантайга уопсайа 242 тиэргэн уонна 118 олорор дьиэ ууга барда.