Сайыҥҥы уоппусканы хаһан ылар ордугуй?

Сайын — уоппуска кэмэ. Бу кэмҥэ сынньалаҥҥытын сөпкө былааннаатахха, уоппуска күнүн уһатыахха эбэтэр үлэ биэрээччиттэн ылар төлөбүр харчытын элбэтиэххэ сөп. Туох сыаллааххытыттан көрөн, уоппуска кэмин сөпкө талыахха наада.

Элбэх харчыны ылыаххытын баҕарар буоллаххытына

Уоппуска харчытын  элбэтэр туһуттан, саамай элбэх үлэ күннээх ыйдартан талар ордук. Тоҕо диэтэххэ, маннык түгэҥҥэ биир үлэ күнүн сыаната намтыыр, ол түмүгэр уоппуска төлөбүрүн суумата улаатар. 2026 сыл сайыныгар саамай элбэх үлэ күннээх ыйынан от ыйа буолар — барыта 23 үлэ күнэ. Бу ыйга сынньанар харчы өттүнэн саамай барыстаах буолуоҕа.

Уһуннук сынньаныаххытын баҕарар буоллаххытына

Оттон сынньалаҥ күнүн уһатыаххытын баҕарар буоллаххытына, бырааһынньыктаах, эбэтэр уһун өрөбүллэрдээх ыйдары таларгыт сүбэлэнэр. Сайыҥҥы кэмҥэ маҥнайгы ый, бэс ыйа, ордук табыгастаах. Тоҕо диэтэххэ, бэс ыйын 12 күнүгэр — Арассыыйа күнэ бэлиэтэнэр.

Бэс ыйын 12 күнэ бээтинсэҕэ түбэһэр. Онон Арассыыйа олохтоохторо бэс ыйын 12 күнүттэн 14 күнүгэр диэри үс күнү быһа сынньаналлар. Сынньалаҥҥытын өссө уһатар туһуттан, бу бырааһынньык иннинэ эбэтэр кэннинэ уоппускаҕытын сыһыары ыллаххытына, дьиҥнээх уоппускаҕыт күнэ толору харыстанар уонна сынньанар кэмҥит биллэрдик уһуур.

Сайыҥҥы сынньалаҥҥытын эрдэттэн былааннааҥ!