Санкт-Петербурга Канье Уэст «Газпром Аренаҕа» буолуохтаах кэнсиэрэ тохтотулунна

Санкт-Петербург куоракка «Газпром Арена» стадиоҥҥа аан дойдуга аатырбыт рэпер Канье Уэст кэнсиэрэ буолбатын туһунан стадион пресс-сулууспата иһитиннэрдэ. Санатан эттэххэ, бу иннинэ Арассыыйа бары сонуннары тарҕатар сириэстибэлэрэ  артыыс кэлэрин туһунан суруйбуттара уонна кэнсиэри күүскэ угуйбуттара.

«Газпром Арена» бэлиэтииринэн, кэнсиэри Москватааҕы«Say Agency» диэн ааҕыныстыба тэрийбит. «»Газпром Арена» тэрээһини ыытарга стадиону арендаҕа биэрии туһунан ханнык даҕаны дуогабарга илии баттаабатаҕа. Онон дуогабар суох буолан, кэнсиэр эмиэ буолбат», — диэн «Известия» хаһыат суруйар.

Бу иннинэ кэнсиэр билиэтин сыаната 9 тыһыынчаттан саҕалаан 160 тыһыынча солкуобайга диэри тиийэрин туһунан иһитиннэриллибитэ. Тэрийээччилэр Арассыыйа уонна омук дойдуларын көрөөччүлэрэ билиэти олус күүскэ атыылаһа олороллорун туһунан биллэрбиттэрэ. Грандиознай шоу алтынньы 10 уонна 11 күннэригэр «Газпром Аренаҕа» ыытыллыахтаах этэ. Ону таһынан, Арассыыйа медиатыгар рэпер кэлэригэр төһө харчыны көрдөөбүтүн уонна кини Владимир Путинныын көрсүөн сөбүн туһунан араас сурахтар күүскэ тарҕана сылдьыбыттара.