Шиномонтаж арыммакка социальнай хантараак харчытын уорбут 

Дьокуускайга судаарыстыбаттан биисинэс арыйаары 350 тыһыынча солкуобай көмөнү албыннаан ылбыт уонна тус наадатыгар туһаммыт киһиэхэ холуобунай дьыала тэрилиннэ. Кини улахан кээмэйдээх судаарыстыба харчытын ылани туһаммытынан буруйданар.

Силиэстийэ быһаарбытынан, 42 саастаах эр киһи Дьокуускайдааҕы Социальнай көмүскэл управлениетыгар социальнай хантараак түһэрсэргэ сайабылыанньа биэрбит. Докумуоннарыгар «шиномонтаж» арыйабын диэн көрдөрбүт.

Урбаанньыт буолар баҕалаах киһиэхэ судаарыстыба итэҕэйэн, социальнай хантараак баттаммыт уонна 350 тыһыынча солкуобай харчы көрүллүбүт. Ол эрээри, харчыны ылан баран, эр киһи туох да мастарыскыайын арыйбатах, ол оннугар  бүддьүөт харчытын тус наадатыгар ороскуоттаабыт. Ити курдук, кини социальнай хантараак усулуобуйатын кэспит уонна судаарыстыбаҕа улахан хоромньуну оҥорбут.

Судаарыстыба харчытын төннөрөр сыалтан, буруйданааччы баайыгар-дуолугар арест уурулунна. Ону таһынан, бу иннинэ гражданскай суут киниттэн 350 тыһыынча солкуобайы төттөрү төлөтөргө уураах таһаарбыта биллэр. Оттон билигин киниэхэ РФ Холуобунай кодексатын 160-с ыстатыйатын 3-с чааһынан холуобунай дьыалаҕа эппиэттиир кэмэ кэллэ.

«Борокуратуура буруйдуур түмүгү бигэргэтэн, холуобунай дьыаланы суукка ыытта. Дьыаланы Дьокуускайдааҕы полиция үлэһиттэрэ силиэстийэлээтилэр», — диэн СӨ Борокуратууратын пресс-сулууспата иһитиннэрэр.