Сиэстэрэ харчытын уордарбыт

Дьокуускай куорат 3-с №-дээх полиция отделын дьуһуурунай чааһыгар 35 саастаах дьахтар ситим нөҥүө албыннаабыттарын туһунан сайабылыанньа биэрбит. Бу туһунан ИДьМ пресс-сулууспата иһитиннэрэр.  

35 саастаах медсиэстэрэ инвестиционнай ырыынагы баһылыырга быһаарыммыт, тута харчыланыан уонна чэпчэкитик дохуоттаныан баҕарбыт. Мэлдьи буоларын курдук, түргэнник харчыланар ыра санаата туолбатах, улахан иэскэ кубулуйбут. Дьахтар түөкүттэргэ уопсайа 750000 солк. тахса суумалаах кирэдьиити уонна тус харчытын ыыппыт.

Билигин бу быһылаанынан силиэстийэ иннинээҕи бэрэбиэркэ ыытыллар. Сиэстэрэ баанын счеттара блоктаммыттар, баантан харчыны көһөрбүт чектэрэ уонна да атын үп докумуоннара ылыллыбыттар.

Эмсэҕэлээччи түөкүттэр ыраахтан олорон  албынныылларын, ол иһигэр киэҥник тарҕаммыт – сымыйа инвестицияларга киирэн биэрэллэрин туһунан эрдэ даҕаны билэр эбит. Кини бу туһунан араас сонуннартан ааҕан, үлэ кэлэктииптэрин иннигэр полиция үлэһиттэрэ кэпсииллэрин истибит.  Ол гынан баран, дьахтар, миигин албынныахтара суоҕа диэн эрэллээх эбит.