Сиинэҕэ туристическай эбийиэк тутуллар

Сиинэҕэ сотору кэминэн  «Поющие скалы» диэн саҥа туристическай маршрут арыллыаҕа.

Бу туһунан «Быһа эпиир» кэмигэр Ил Дархан Айсен Николаев  туризм эйгэтигэр үлэлиир оператор инфраструктураны сайыннарыы туһунан ыйытыытыгар хоруйдууругар бэлиэтээтэ. Өрөспүүбүлүкэ олохтооҕо ыалдьыттары айылҕа бу кэрэхсэбиллээх эбийиэгэр илдьиэн баҕарарын, ол эрээри манна Өлүөнэ очуостарыгар курдук туристарга аналлаах туох да тутуу суоҕун, хаһан кинилэргэ анаан тустаах усулуобуйа тэриллиэн сөбүн ыйытта.

Ил Дархан бу эбийиэккэ үлэ бара турарын иһитиннэрдэ. Сиинэҕэ «Поющие скалы» туристическай маршрут Арассыыйа Бырабыыталыстыбатын Бэрэссэдээтэлин солбуйааччы, дойду Бэрэсидьиэнин Уһук Илин федеральнай уокурукка боломуочуйалаах бэрэстэбиитэлэ Юрий Трутнев уонна Арассыыйа Федерациятын Уһук Илини, Арктиканы сайыннарыыга министиэристибэтин өйөбүллэринэн олоххо киирэр. Санитарнай пууннартан тротуардартан, ыйынньыктартан уонна наадалаах дьиэлэртэн саҕалаан улахан бырайыакка үбүлээһин көрүллүбүтэ.  Бу бырайыак Уһук Илини сайыннарыы судаарыстыбаннай бырагырааматыгар киирэр. Уопсай сыаната 70 мөлүйүөн солкуобай, үлэлэр сэтинньи 1 күнүгэр диэри бүтүөхтээхтэр. Маны таһынан,  Саха сиригэр 110 килэмиэтирдээх «Туймаада хочотун ситимэ» диэн улахан экологическай ыллык оҥоһулла турар. Ыллык Табаҕаттан Кангаласс тумуһугар диэри мырааннарынан ааһыаҕа. Бырайыак Уһук Илини сайыннарыы министиэристибэтин куонкуруһун ааспыта уонна сынньанар сирдээх, кыра архитектурнай оҥоһуулаах туристическай  ыллыктары оҥорууга испииһэккэ киирбитэ, — диэн хоруйдаата Ил Дархан.