Синоптиктар бэс ыйыгар саҥа билгэни оҥордулар: сылааһы кэтэһиллибэт

Бэс ыйа саҕалана илигиттэн метеорологтар номнуо бэйэлэрин билгэлээһиннэрин уларыттылар. Төрүөтэ — саҥа дааннайдар.

«Салгын температуратын туругун саҥардыллыбыт дааннайдара синоптиктары билгэлэрин уларытарга күһэйдэ: сылааһы кэтэспит эрэгийиэннэргэ, билигин элбэх ардаҕы уонна сөрүүн күннэри эрэннэрэллэр, оттон сорохторго, төттөрүтүн куйааһы», — диэн кэпсииллэр метеоролог Владимир Касьянов уонна синоптик, географическай наука хандьыдаата Ирина Фролова. Бу туһунан РИА новости суруйар.

Сүрүн уларыйыы — атмосфернай фроннар түргэнник солбуйсуохтара. Туруктаах, биир тэҥ сылаас буолуо суоҕа. Бэс ыйын күнэ-дьыла эмискэ уларыйа-тэлэрийэ туруоҕа.

«Синоптик бэлиэтииринэн, бэс ыйын бастакы аҥаара сорох эрэгийиэннэргэ килиимэт нуорматыттан сөрүүн, элбэх ардахтаах уонна этиҥнээх буолуон сөп, ордук киин эрэгийиэннэргэ. Онуоха салгын температуратын түһүүтэ кылгас кэмнээх, ол эрээри биллэр буолуоҕа: хас да сылаас күн кэнниттэн ыам ыйыгар маарынныыр халлааҥҥа төннүөн сөп», — диэн сэрэтэр Касьянов.

Бэс ыйын сүрүн уратыта — биир нэдиэлэ сылаас — иккис нэдиэлэ сөрүүн, ардахтаах. 

Саха сиригэр элбэх сөҥүүлээх уһун күннэри сабаҕалыыллар. Сылааһа да, күнэ да суох — сииктээх уонна былыттаах сайын.

«Даачалаахтарга икки түгэн суолталаах. Бастакытынан, ый саҕаланыытыгар сөрүүн түүннэр уонна ардахтар түһүөхтэрэ, сылааһы сөбүлүүр үүнээйилэри сабар матырыйаалынан харыстыыр ордугун уонна уу кутуутун ыксаамыахха наадатын этэллэр», — диэтилэр эспиэрдэр.

«Саха сиригэр синоптиктар сылаас таҥаһы бүтэһиктээхтик хомуйар үгэстэн аккаастанары сүбэлииллэр. Бэс ыйыгар чэпчэки куурка уонна зонтик суумкаҕа баара, сарсыарда сайыҥҥылыы сылаас да буоллар, үксүн наада буолуон сөп», — диир Владимир Касьянов.

Сүрүн түмүк — бэс ыйа биир тэҥ сылаас буолбакка, уларыйымтыа буолуоҕа. Биһигини «халлаан оонньуута күүтэр» — биир нэдиэлэ сылаас, биир нэдиэлэ ардах, онтон эмиэ сылаас. Уларыйыыларга бэлэм буолуҥ уонна зонтиккытын ыскаапка ыраах уурумаҥ.