Сорох өрүстэргэ уу таһыма түһэн эрэр

Өлүөнэ өрүскэ Өлүөхүмэ куорат аттынан уу таһыма кутталлаах бэлиэттэн аллараа түстэ. От ыйын 22 күнүн күнүс 12 чаастааҕы туругунан, уу таһыма 1 041 см буолла, ааспыт 8 чаас иһигэр 31 см намтаата, оттон кутталлаах таһым — 1 060 см. Бу туһунан Саха Өрөспүүбүлүкэтин Гражданскай оборуона дьыалаларыгар уонна нэһилиэнньэ олоҕор-дьаһаҕар куттал суох буолуутун хааччыйыыга министиэристибэтэ иһитиннэрдэ.

Өлүөхүмэ оройуонугар уу түһүүтэ барарын үрдүнэн, халаан содула салҕанар. Ууга барбыт 32 тэлгэһэ сирэ, ол иһигэр биир олорор дьиэ ууга турар. Саха сирин үгүс өрүстэригэр уу таһыма араас хайысханан хамсыыр. Сорох учаастактарга намтааһын салҕанар, оттон өрөспүүбүлүкэ киин өттүгэр уу таһыма үрдүүрэ бэлиэтэнэр.

Хаҥалас улууһугар Иһит сэлиэнньэтин таһыгар уу таһыма 12 чаас иһигэр 3 см намтаан, 1 598 см буолла, бу кутталлаах көстүү бэлиэтиттэн биллэ намыһах. Покровскай куоракка, төттөрүтүн, уу таһыма үрдүү турар: таһым 829 см тиийдэ, 12 чаас иһигэр 20 см эбилиннэ, ол эрээри кутталлаах бэлиэҕэ диэри лаппа ыраах.

Дьокуускай куорат аттынан Өлүөнэ өрүскэ уу таһыма үрдүү турар. Киин куоракка суукка иһигэр уу 73 см үрдээн, 562 см тиийбит, кутталлаах таһым — 827 см. Табаҕаҕа суукка иһигэр 61 см үрдээн — 867 см буолбут, Пригороднай бөһүөлэккэ — 12 чаас иһигэр 17 см эбиллэн, 829 см диэри тиийбит, Кангаласка — 800 см диэри, бу иннинээҕи сууккаттан 75 см үрдүк. Гидропостарга барытыгар уу таһыма кутталлаах көстүү бэлиэлэриттэн намыһах.

Сунтаар улууһугар Бүлүү өрүскэ уу таһымын намтааһына салҕанар. Ол да буоллар, ууга барбыт 150 тэлгэһэ сирэ, ол иһигэр 76 олорор дьиэ (манна 498 киһи, ол иһигэр 142 оҕо олорор) баар.  Кэмпэндээйи, Толстой (Туойдаах) уонна Тэҥкэ бөһүөлэктэригэр тиийэр массыына суола быстан турар.

Эбээн-Бытантай улууһугар эмиэ уу таһыма сыыйа намтыыр. Баатаҕай-Алыыта сэлиэнньэҕэ түөрт чаас иһигэр уу 16 см түспүт, ол эрээри икки тэлгэһэ сирэ ууга хаалбыт. Тиэхиньикэ турар сиригэр уонна «Саккырыыр» аэропуорт уматык сапыраапкатын сиригэр уу киирбит. Кустуур сэлиэнньэтигэр түөрт чаас иһигэр уу таһыма 7 см намтаабыт, кутталлаах бэлиэҕэ диэри 80–90 см хаалбыт. Манна 22 тэлгэһэ сирэ ууга барбыт, быстах олордор пууҥҥа 27 киһи, ол иһигэр 12 оҕо баар. Дьарҕаалаахха түөрт чаас иһигэр уу таһыма 20 см түспүт.

Саха Өрөспүүбүлүкэтин Гражданскай оборуона дьыалаларыгар уонна нэһилиэнньэ олоҕор-дьаһаҕар куттал суох буолуутун хааччыйыыга министиэристибэтэ олохтоохторго халаан туһунан иһитиннэриини болҕомтолоохтук кэтээн көрөллөрүгэр ыҥырда. Суоппардарга кутталлаах сирдэринэн айанныыртан туттуналларыгар сүбэлииллэр, суол бүрүөһүнэ алдьаммытын туһунан иһитиннэриини учуоттуулларыгар этэллэр. Ону сэргэ, гражданнарга хочо сирдэригэр тахсыбаттарыгар, тиэхиньикэни намыһах сирдэргэ хаалларбаттарыгар, оттон уу ылыан сөптөөх куттала баар буоллаҕына, малларын-салларын уонна тыа хаһаайыстыбатын кыылларын эрдэттэн үрдүк сиргэ таһааралларыгар сүбэлииллэр.

Ыксаллаах быһыы-майгы үөскээтэҕинэ, «112» быыһыыр сулууспалар биир кэлим нүөмэрдэригэр эрийиҥ.